ပုတ်ခတ်တိုင်း စုတ်ပြတ်ရမှာလား
ပုတ်ခတ်တိုင်း စုတ်ပြတ်ရရင် ဗုဒ္ဓဆိုတဲ့
ဘုရားရှင်တောင် လောကမှာ ပွင့်လာမှာ
မဟုတ်ဘူး။
ပြောချင်တာက...
ဆောင်းရာသီရောက်လာရင် ဆောင်းရဲ့
အအေးဒဏ်ကို မလွဲမသွေခံရမှာဖြစ်သလို
လူ့လောကထဲရောက်လာရင်လည်း
လူတွေရဲ့တိုက်ခိုက်,ပုတ်ခတ်မှုဒဏ်ကို
မလွဲမသွေ ခံကြရမှာပဲ။
ဆောင်းကို မအေးပါနဲ့လို့ တားမရသလို
လူတွေကိုလည်း မပုတ်ခတ်ပါနဲ့လို့ တားမရဘူး။
အအေးကို အနွေးနဲ့သာ ကာကွယ်ပြီး
နွေးနွေးထွေးထွေး နေတတ်အောင်
နေနိုင်အောင် ကြိုးစားရမှာဖြစ်သလို
တိုက်ခိုက်,ပုတ်ခတ်မှုဒဏ်ကိုလည်း
နှလုံးသွင်းမှန်ကန်မှုဆိုတဲ့
"ယောနိသောမနသိကာရ"နဲ့သာ
ကာကွယ်ရပြီး နွေးနွေးထွေးထွေး
နေတတ်နိုင် နေနိုင်အောင် ကြိုးစားရမှာပါ။
တကယ်တော့ တစ်ဘက်က ကိုယ့်ကို
မလိုလို့ ပြောနေတာကို ကိုယ်က လိုတယ်ထင်ပြီး
ထည့်ထည့်တွေးနေတာကိုက မှားနေတာပါ။
တစ်ခါတလေ ထည့်ထည့်မတွေးပဲ
တည့်တည့်တွေးတာက ပိုကောင်းပါတယ်။
တိုက်ခိုက်, ပုတ်ခတ်မှုဒဏ်တွေ ခံလာရတဲ့အခါ
ဒီဖြေဆေးလေးတွေကို သောက်ပြီး နွေးထွေးစွာ
နေကြည့်ပါ။ 😊
၁။ အကောင်းတွေနဲ့ပြည့်နေတဲ့ ဘုရားရှင်တောင်မှ
ကဲ့ရဲ့ပုတ်ခတ်မှုဒဏ်ကို ခံခဲ့ရသေးတာပဲလေ၊
ငါက ဘာမို့လို့လဲ။
၂။ တစ်ဖက်က မလိုလို့ ပြောနေတာကို လိုတယ်လို့
ထင်ပြီး ထည့်ထည့်တွေးနေတာကိုက ငါမှားတာ။
၃။ အတိတ်က အကြွေးတွေကို ဆပ်နေရတယ်။
၄။ ဘေးစကားကို ဘေးမှာထားတာ အကောင်းဆုံး။
၅။ ငါ့ခေါင်းဟာ အမှိုက်ပုံးတစ်လုံး မဟုတ်ဘူး။
၆။ အပင်မြင့်ရင် လေအတိုက်ခံရတာ သဘာဝပဲလေ။
၇။ ဒါလည်းပဲ အချိန်တန်ရင် ပြီးသွားမှာပါ။
တကယ်တော့ သူတို့ ဘယ်လောက်ပေးပေး
ကိုယ်ဘက်က လက်ခံမှ ဖြစ်တာပါ။
ရောဂါတွေပို အသက်တွေတိုလာကြပြီ
နဂိုအပူတွေထက် အပိုအပူတွေကို မယူမိမှသာ
ဘဝဟာ မိတ်ကပ်လိမ်းစရာမလိုဘဲ ပိုလှမှာ
မဟုတ်လား။
မေတ္တာဖြင့်
အရှင်စန္ဒာဝရာလင်္ကာရ
မဟာဂန္ဓာရုံ
17
9August 13, 2023 4.8K 1 7
