من بیلمهدیم سینا بیلر، یانا بیلر
من اورهیی اورک کیمی ساخلامادیم
نه بیل ایدیم بوز باخیشدان دونا بیلر
من اورهیی اورک کیمی ساخلامادیم
قوهوم گلدی، قونشو ییغدی، یاد آپاردی
غملی گلن قیسمتینی شاد آپاردی
اودو سؤنن اورهییمدن اود آپاردی
من اورهیی اورک کیمی ساخلامادیم
خئیره، شره، تویا، یاسا یویور دئدیم
طالعیمه یارالانمیش جویور دئدیم
اؤزون قیزدیر، هاردا کیم اوشویور دئدیم
من اورهیی اورک کیمی ساخلامادیم
درد داغینین کولونگ چالان فرهادییام
توستوسویم، دومانییام، فریادییام
اؤز قلبیمین قان ایچهنی جلادییام
من اورهیی اورک کیمی ساخلامادیم
یئری گؤیه، گؤیو یئره باغلا دئدیم
آلیش دئدیم، توتوش دئدیم، چاغلا دئدیم
یاس گؤرنده هؤنکور-هؤنکور آغلا دئدیم
من اورهیی اورک کیمی ساخلامادیم
دؤولت یوکو، میللت یوکو، شؤهرت یوکو
بو میللتین ایچیندهکی ذیللت یوکو
بو یوکلرین آلتینداکی زحمت یوکو
من اورهیی اورک کیمی ساخلامادیم
من اورهیی چیچک کیمی ساخلامادیم
یاغ ایچینده بؤیرک کیمی ساخلامادیم
هئی اریتدیم، هئی چوروتدوم، هئی قاناتدیم
من اورهیی اورک کیمی ساخلامادیم
هؤنکورن داغ دؤشوندن قایا قوپدو
آغلایاندا بوش-بوشونا آغلامادیم
من اورهیی اورک کیمی ساخلامادیم
ساخلامادیم، ساخلامادیم، ساخلامادیم
زلیم خان یعقوب
❤️ @chobanoghloo
════༻♥️༺═══
September 7, 2026 36
