چوبان اوغلونون شعر کانالی

مَندن کوسمه، گول نَفَسین تؤیشویَر
سَنی گؤروب بنؤوشه‌لر پؤرشویَر
دایان گولوم! آیاقلارین اوشویر
کیرپیییمی آیاغینا سَریم قوی!

اَل وئریرم، اسدیریرسن اَلیمی
گول وئریرم، کوسدورورسن گولومو
یاواش یئری! یئل داغیتمیش تئلینی
اوره‌ییمین تئللرینه هؤروم قوی!

حَسرتیمین چیچک‌لری خاللانیب
اَدالارین شان باغلاییب، باللانیب
دوداغیندا کوسوشمه‌لر بارلانیب
او بارلاری دوداغیم‌لا دَریم قوی!

هئچ بیلمیرم اولدوز نه‌دیر، آی نه‌دیر!
بورجوم نه بورج، گونوم نه گون، آی نه‌دیر!
باخیشلارین طالئعیمه آینادیر
آیاق ساخلا، طالئعیمی گؤروم قوی!

شاهمار یازیق هاردان آلسین دؤزومو؟
نازین، غَمزه‌ن سیندیریبدیر دیزیمی
یانا-یانا کول ائله‌دیم اؤزومو
سورمه اولوم، گؤزلرینه گیریم قوی!...


شاهمار_اكبرزاده
لاله‌زار_موصطافایئوا

سَنسیز , ائی گول , کؤنلومون بیر دَم قَراری یوخدو, یوخ !
سَندن اؤزگه نئيله‌سين ,  بیر غَمکوساری یوخدو , یوخ!

دَردِ هیجران چاره‌سی  هَر چَند بیلدیم صَبریمیش
نئيله‌ييم , بيللاه , بو دَریانین کَناری یوخدو , یوخ!

لئیلی ! لئیلی ! سؤيله‌ييب چوخلار دئيير كيم , عاشيقم
لئيک مَجنون تَک اونون بیر داغداری یوخدو , یوخ!

هَر خَزانین بیر باهاری اونسوز اولماز , اولماسین
بو چؤل اولموش گولسیتانین , بیر باهاری یوخدو , یوخ!

گوللری , بولبوللری , آب و هواسی چوخ گؤزل
حئیف کیمی , بو گولشنین بیر گولوزاری یوخدو , یوخ!

هیچ عئیبین يوخ , گؤزه‌للیک هامى سَنده جَمعدير
نئيله‌ييم اَمما كی , عَهدين ائعتیباری يوخدو , يوخ!

سَن نه بَسلرسن بو تَرلانى ،نَباتى روز و شب؟
مَن بو داغى چوخ دولاندیم , بیر شیکاری یوخدو،  یوخ!


ابوالقاسیم_نباتی
یعقوب_ممدوو