Дадажоним..
Сизга айтолмаган, айтолмайдиган гапларим бисёр. Сўзларимнинг аввалини узр билан бошлашим керак албатта. Сизни нотўғри тушунганларим, озор берганларим, бари-бариси учун.
Турмушга чиққунимга қадар мени унчалик яхши кўрмайсиз деб ўйлардим. Яхши кўришингизни билардим лекин меҳрингиз асосан қаҳрингиз, қаттиққўллигингиз ортида яширин бўлгани учун мен ҳам очиқчасига севолмасдим сизни.. қўрқардим. Орамизда ўтган аччиқ-чучук гапларни эслаш ҳам оғир.
«Тўйдан кейин 1 ойда 1 марта кел, узоқ қолма, оиланг бошқа энди» деб кўп айтардингиз, лекин онамдан кўп хабар оладиган, хавотирланадиган, 2 ҳафта бормасам нега келмаяпти дейдиган сиз бўлдингиз.. уйга кетяпман десам ҳали тугамаган ишингизни ташлаб чиқиб бирга кетамиз дейдиган сиз бўлдингиз.. қўнғироқ қилсам уйга бориб онамга «менга Гули телефон қилди» деб мақтанаркансиз.. мен борадиган куним нима егим келаётганини қайта қайта сўраб, шундай қувонч билан кўришардингиз-ки.. дадажоним.. нега ёнингизда пайтим шуларни ҳис қилмадим? Худбинмидим шунчалик? Ғурурим йўл қўймасмиди? Нима эди бизни бир-биримиздан узоқ сақлаган?
Эсимда, ёшлигимда пулимиз кўп бўлмасди, Тошкентда яқинлар йўқ, оилада боқувчи бир ўзингиз, уй ижара, ўқитувчининг маоши эса ҳаммага маълум. Ишга пиёда бориб келишларингиз, битта портфелни чириб кетгунча, ямоқлари билан тутиб менга ҳар йили янги папка олиб беришингиз есимда.. йиллар кийилган туфлингиз билан ёмғирда оёқларингиз ивиб келиб, тунда туфлини қуритиб эрталаб яна кийиб кетишингиз, менга еса иссиқ оёқ кийимлар олиб беришингиз эсимда.. курткангиз енги титилиб кетарди, ранги ўчарди, лекин мени устим бутлигига доим қайғурардингиз, эсимда.. эски тускилар кўп киярдим, бозорда ўзим истаганлариммас арзонроқ вариантлар олинарди кўпинча, дугоналарим олдида ўзимни хўрлангандай ҳис қилардим мен нодон. Синфдошлар бирор жойга борадиган бўлсак бир баҳона билан юборилмасдим, сабаби бунга ортиқча пул бўлмаслиги эди, билардим, ич ичимдан сиқилардим, ҳам ўзимга ачинардим ҳам сизга.. Ҳеч қачон буларни сизга айтмаганман, шундоқ ҳам қийналаётганингизни сезардим, лекин юз ифодамдан муҳтожлик сабаб оғринишимни ҳис қилардингиз ва ҳамиша энг яхшисини муҳайё қилишга интилардингиз, бу муҳаббатингизни жахл, кесатишлар ортига яшириб бўлсада. Фарзандининг кўзларига пулсизлик сабаб қаролмаслик ота учун, эркак учун нақадар оғир бўлган экан-а?( Юрагингизни роса сиққан эканман..
Муносабатларимиз баъзан меҳрга тўла, баъзан эса қарама-қарши эди, бундан афсусдаман. Балки қизингиз учун ширин сўзларингиз етишмагандир. Aйниқса охирги йиллар орамиздаги ип таранглашганди. Мендаги дунёқарашнинг кескин ўзгаргани, китоблар, дўстларим ва ҳоказолар сабаб эди бунга. Балки иккимиз ҳам ён босишимиз, бир-биримизни тушунишимиз керак бўлгандир, билмадим, билолмадим.. Майли, буларни эсламайлик, зеро мактубимда кимдан қандай камчилик ўтганини эмас, сизда кўришим шарт бўлган, лекин кўришни истамаган жиҳатларни ёзмоқчи, айбларимни тан олмоқчиман.
Менинг илк муҳаббатим, чинакам эркакдаги фазилатларни ҳис қилдирган, Исломдаги кўп ибодатларни, сифатларни тилда айтмаса-да амалда кўрсатган, дунёни моддиятдан иборат эмаслиги, илм ҳамма нарсадан устун эканини сингдирган биринчи устозим экансиз.. дадажон, билиб билмай қилган хатоларим, айтган гапларим, барчасидан қаттиқ афсусдаман. Буёғига ҳаммаси гўзал бўлади ИнШааAллоҳ. Сизни жуда яхши кўраман. Сизнинг қизингиз эканимдан фахрланаман, Дада.
