Xalq bankining Uzcard va Octobankning Humo kartalarini Apple Pay'ga…

Xalq bankining Uzcard va Octobankning Humo kartalarini Apple Pay'ga qo'shish mumkin

2026-yil 17-noyabrdan Xalq banki mijozlari o'z Uzcard kartasini, Octobank mijozlari esa Humo kartasini Apple Pay'ga qo'sha oladi. Bu haqda Markaziy bank xabar berdi.

Kartani Apple Wallet ilovasiga o'zingiz qo'shib, iPhone, Apple Watch va Apple'ning boshqa mos qurilmalari orqali kontaktsiz to'lov qilishingiz mumkin.

Boshqa tijorat banklarining Uzcard va Humo kartalarini hozircha ulab bo'lmaydi. Markaziy bankning aytishicha, banklar va to'lov tizimlari texnik jihatdan tayyor bo'lgach, bu kartalar bosqichma-bosqich ulanadi. Aniq muddat aytilmadi.

Apple Pay O'zbekistonda 2026-yil 27-oktabrdan beri rasman ishlayapti. Dastlab u faqat ayrim tijorat banklarining Visa va Mastercard kartalarida ishlardi. 17-noyabrdan ularga shu ikki bankning Uzcard va Humo kartalari ham qo'shildi.

Markaziy bank ma'lumoticha, O'zbekiston Markaziy Osiyoda milliy to'lov tizimlari kartalarini Apple Pay'ga ulagan birinchi davlat bo'ldi. MDH davlatlari orasida ham hozircha faqat O'zbekistonda bunday kartalar Apple Pay orqali amalda ishlaydi.

Markaziy bankning ta'kidlashicha, Apple Pay orqali to'langanda karta ma'lumotlarini va operatsiyalar xavfsizligini maxsus texnologiyalar himoya qiladi.

🧠 Bilim Hack · bilim-ha.uz
20-noyabr, 2026 20