من اسنين . للحين . ينزف نحري لهاليوم
اتناك . وانخاك . ياطالب ثاري اتگوم
آنه ثارك. ناري نارك . بإنتظارك . يا طالب ثاري اتگوم
____
صبرت جروحي يمهدي وطالت الغيبه وحنيني
من الف عام وأتاني سيفك ايسكّن ونيني
يبني عيني اترابي دربك برايتك يمته تجيني
وامّنيّت الثار مهدي ذمه ما بينك وبيني
متانيك . وادريك . تبچيلي بدم عيناك
متانيك . ايهم بيك . كل فكري وگلبي وياك
لخاطري انته . المُر جرعته
واللي ردته . يا طالب ثاري اتگوم
_____
انتظاراتي أليمه وانته يبني بهايه تدري
قبلك هواي انتظرته مْن الشريعه يردلي بدري
يبني من طال ورحتله انكسر من شفته ظهري
شاب گلبي باإنتظاره وشيّب من الغيبه صبري
لليوم . محروم . گلب اسكينه مْن الماي
واحساس . عباس . يبرد لو شافك جاي
ارجع الهم . بِل عطشهم
كل أملهم . يا طالب ثاري اتگوم
________
إتغرب بنص هيمه ظعني وعيشتك با الهيمه اليه
وللدمه الصب من چبدتي عينك اتصب دم عليه
بيني ما ببينك يمهدي جروح واينزفن سويه
وينجرح گلبي من اشوفك شايل ابمتنك رقيه
ويلاه . أبَتَاه . صوت بإذني الها الساع
والايد . بالايد . چان اجَرح كل اوداع
للزچيه . ولرقيه . لكل رزيه . يا طالب ثاري اتگوم
____
يا غريب الدنيه حالك ايذكّر جروحي بغربتي
من بقيت آنه وخيامي وطاحو اگبالي صُحبتي
استنصرت محد فزعلي وسيفي من فارگ يمنتي
عفته الك سيفي يمهدي ومنك امتاني نصرتي
من طاح . ما راح . سيفي لغيرك يا حيد
وعا الگاع . اذراع . راية عباس اتريد
بگلبي عاشر . ايتاني باچر
تلفي ناصر . ياطالب ثاري اتگوم
_____
اهواي ما تنعد جروحي وكل جروحي انته عشتها
وطرفي من درته لخيامي نظرتي اشبيها اعرفتها
عمتك الظلت وَحدها با المخيم من عفتها
لهسه تنتظرك يمهدي هوايه عذبها وكتها
واتلوب . چم دوب . وتحسب چم عام وعام
وچم نار . للثار . تنتظرك بأرض الشام
خذ قرارك. وانوي ثارك. بإنتظارك .يا طالب ثاري اتگوم
قال مولانا ابا عبد الله الحسين مخاطبا ولده السجاد صلوات الله وسلامه عليهم :
[ يَا وَلَدي يَا عَليُّ، وَاللهِ! لاَ يَسْكُنُ دَمي حَتَّى يَبْعَثَ اللهُ الْمَهْديَّ،.] * المَنَاقب : ج ٤ ص ٨٥
اللهم عجل لوليك المنتقم الفرج
10 ديسمبر 2024 4.2 ألف
