بليله شح ضواها ومنخسف گمرها
دفنو الزچيه وانخفه قبرها
هلّن دموع الصميده . زهرته ويدفنها بيده
______
علي هد حيله الوداع
جرح وسدها با الگاع . غريبه
رمز ناموس الاشراف
گبر ما عدها ينشاف . غريبه
عفّ أثرها . ودمعته فوگ الگبر ظلت دلاله
بگلبه سرها . رجع منها ومحني ظل يمها خياله
ضم عطرها . زهرته الما مار فرگتها اعله باله
ساكت برجوعه . وجدمه يمشي حيره
وشلت دموعه . نظرته الاخيره
جرحه مدفنها وحيده . زهرته ويدفنها بيده
______
جرح ويوداع جروح
ينوح المرتضى ينوح . حقيقه
منو مفكر علي الحيد
يخلي اعله الضهر ايد . بطريقه
وضعه جارح . خطوه يمشي وخطوه يوگف حيله وينه
حزامه طايح . راحت الچانت گبل عا الهم تعينه
هضمه واضح . ينقره بعيونه حزنه عالحزينه
انطفه صبحها . وحيدر بعذابه
شاهد لجرحها . دم بقه اعله بابه
ينسه حيدر لا بعيده . زهرته ويدفنها بيده
____
علي رد مو علي الراح
حيله اعله الگبر طاح . هضيمه
رجع ما مثله ابو امصاب
وصل بيته ولگه الباب . هضيمه
انگابه كسره . بوجهه طول العمر ظل اوضح علامه
ومال ظهره . ابلايه حيل التوگف بحيله القيامه
بيد صبره . وبيد يمسح دمعته ودمع اليتامه
ظلمه بيته ظلمه . اتغيرت ظروفه
وبعده بابه هضمه . يموت من يشوفه
واسم فاطمته نشيده . زهرته ويدفنها بيده
_______
تعيش بروحه الالام
وتطيح دموع الايتام . بدينه
بعبايتها يلوذون
وملامح كل العيون . حزينه
راحت امهم . راح گلب الچان يغمرهم حنانه
اشگد حزنهم . وگلب فاطم يا گلب ياخذ مكانه
لم شملهم . علي ودمعة زينب اگباله امتحانه
زينب الحزينه . يا صبر مثلها
وياها من زغرها . كل جروح اهلها
ولعلي صارت عضيده . زهرته ويدفنها بيده
______
بعد شتشوف العيون
علي واولاده يبچون . خساره
أنست ماكو ابتسامات
زمان ام الحسن مات . نهاره
يا ليالي . تغمض عيون اليتم وتصد حلمها
شلون تالي . عايله اتدور حضن ياهو يضمها
گبل عالي . سور حيدر وانطوت روحه بألمها
عايش بنحيبه . حيدر بدياره
مارجع حبيبه . شيجبر انكساره
زمن عشرتهه اشيعيده . زهرته ويدفنها بيده
يارب محمد انتقم لإبنة محمد عليهم السلام
اللهم عجل لوليك المنتقم الفرج
9 نوفمبر 2024 3.5 ألف
