Автомобилсозликда маҳаллийлаштириш даражаси 50 фоиздан ошди
Битта автомобиль — минглаб деталлар. Уларнинг тобора кўпроқ қисмини Ўзбекистонда ишлаб чиқариш эса ўнлаб маҳаллий корхоналарни ягона саноат занжирига бирлаштирмоқда.
Бугун компанияда автомобиллар учун зарур бутловчи қисмларни маҳаллийлаштириш, аввал импорт қилинган компонентларни мамлакатнинг ўзида ишлаб чиқариш ҳамда маҳаллий етказиб берувчилар билан кооперацияни кенгайтиришга алоҳида эътибор қаратилмоқда.
Бу саъй-ҳаракатлар натижасида «UzAuto Motors»да маҳаллийлаштириш даражаси 50 фоиздан юқори кўрсаткичга етди. Навбатдаги мақсад эса ушбу кўрсаткични 70 фоизга етказиш.
Айниқса, автомобиль кузови учун пресслаб тайёрланадиган панеллар каби технологик жиҳатдан мураккаб компонентларни Ўзбекистонда ишлаб чиқаришни ўзлаштириш маҳаллий автомобилсозлик саноати учун янги имкониятлар эшигини очмоқда.
Бу жараённинг аҳамияти фақат битта автомобилда қанча маҳаллий детал борлиги билан ўлчанмайди. Ҳар бир ўзлаштирилган компонент — маҳаллий корхона учун янги буюртма, янги технология ва саноат кооперациясидаги янги имконият демакдир.
Шу тариқа автомобилсозликда маҳаллийлаштириш нафақат импорт ўрнини босиш, балки янги ишлаб чиқариш қувватларини яратиш, маҳаллий корхоналар ўртасидаги кооперацияни кучайтириш ва миллий саноат занжирини янада ривожлантиришга хизмат қилмоқда.
Andijan.uz|Facebook|Instagram|Youtube|X
September 1, 2026 1.4K 5
