10#ወንጌል_አርበኛ_ጋሼ_አዲሴ_ሩጫውን_ጨረሰ!
“መልካሙን ገድል ተጋድያለሁ፥ ሩጫዬን ጨርሻለሁ፥ እምነቴን ጠብቄአለሁ።” — 2 ጢሞቴዎስ 4፥7
የወንጌል አርበኛ፣ የእምነት ሰውና በርካቶችን በትምህርትና በምሳሌ ያገለገሉት ውድ አባታችን ጋሼ አዲሴ ቀልበሰው የእምነት ሩጫቸውን በታማኝነት ጨርሰው ወደ ጌታቸው ተሰብስበዋል።
ጋሼ አዲሴ በሐዋሳ የሕይወት ብርሃን ቤተክርስቲያን፣ እንዲሁም ከደቡብ ኢትዮጵያ ወንጌላውያን አብያተ ክርስቲያናት ኅብረት ምሥረታ ጀምሮ በማደራጀት፣ በማስተባበርና በማገልገል ረጅም ዓመታትን በታማኝነት አሳልፈዋል።
በኢትዮጵያ የሕይወት ብርሃን ቤተክርስቲያንም በትምህርትና ሥልጠና ክፍል ኃላፊ በመሆን፣ ብዙዎችን አስተምረው፣ አሰልጥነውና ለአገልግሎት አብቅተው የማይረሳ አሻራ አሳርፈዋል። በሕይወታቸው ያሳዩት ቅንነት፣ ትህትና፣ ቸርነትና ለሰው ያላቸው ፍቅር በብዙዎች ልብ ውስጥ ሲታወስ ይኖራል።
በተወዳጁ አባታችንን ላይ የደረሰው ሕመም እንዲሻላቸው በአገር ውስጥና በውጭ የሕክምና እርዳታ ሲያገኙ ቆይተዋል። ሆኖም የእግዚአብሔር ፈቃድ ሆኖ የምድራዊ ሩጫቸውን ጨርሰው ወደ ጌታቸው ተሰብስበዋል።
ሐዘናችን እጅግ መሪር ቢሆንም፣ የእምነት ሰው የሆነው ወንድማችን የተሰጠውን አደራ በታማኝነት ተወጥቶ፣ ሩጫውን ጨርሶ፣ እምነቱን ጠብቆ መሄዱን በማሰብ በጌታ እንጽናናለን።
“አዲሴ ቀልብሰው፤ ከፉ ቢናገሩት ደግ የሚመልሰው”
ይህ አባባል ጋሼ አዲሴ በሕይወት በነበሩበት ዘመን ለሐዋሳ ማኅበረሰብ ያሳዩትን ወሰን የሌለውን ቅንነት፣ ቸርነትና መልካም ልብ የሚገልጽ በሁሉም ዘንድ የታወቀ ምስክርነት ነው።
የእርሳቸው ሕይወት በራሱ መልዕክት ነበር፤ አገልግሎታቸው በራሱ ትምህርት ነበር፤ ትውስታቸውም በብዙዎች ልብ ውስጥ ይኖራል።
ጋሼ አዲሴ፣ የእምነት ሩጫዎን ጨርሰዋል።
አደራዎን በታማኝነት ተወጥተዋል።
የዘሩት ዘር በብዙዎች ሕይወት ፍሬ ያፈራል።
መልካሙ አሻራዎ ሳይሰረዝ ይኖራል።
እግዚአብሔር ለመላው ቤተሰብ፣ ለሐዋሳ አጥቢያ የሕይወት ብርሃን ቤተክርስቲያን፣ ለሐዋሳ ከተማ ማኅበረሰብ፣ ለየሕይወት ብርሃን ክልል፣ ለኢትዮጵያ የሕይወት ብርሃን ዋና ጽ/ቤት፣ ለቀድሞ የሥራ ባልደረቦች፣ ለወዳጅ ዘመዶችና ለመላው የእምነት ቤተሰብ መጽናናትን፣ ብርታትንና ሰላምን ይስጥ።
#የወንጌል አርበኛው ጋሼ አዲሴ የእምነት ሩጫቸውን ጨርሰዋል።
እንወድሃለን፣ እናስታውስሃለን፣ የዘራኸውም ዘር በትውልድ ይቀጥላል።
