أول حاجة تعملها قبل ما تقيس الضغط
تحس نبض الحالة علشان تعرف هو منتظم ولا لأ
علشان الأجهزة الالكترونية مش دقيقة في حالات عدم الانتظام وهنا تقيس بالجهاز العادي سواء العداد أو الزئبقي لو عندك
.
مهم جداً معايرة الجهاز اللي أنت شغال به ولو إلكتروني يكون معتمد زي OMRON مثلاً أو غيره .. وفيه على الصفحة مقال كامل بالمواقع الخاصة بالأجهزة دي وأفضلها
.
مهم جداً يكون المريض هادي وقاعد على كرسي ورجله مريحة على الأرض مش متعلقة (يعني كرسي عالي أو سرير الكشف عالي ورجله مش لامسه الأرض) وذراعه يكون مفرود مش مثني ويكون مريح على حاجة يعني على المكتب أو أرضية السرير ! مش متعلّق في الهوا !!) ولا حاطط رجل على رجل .. وطبعاً ممكن المريض يقيسه وهو نايم على السرير بتاع الكشف عادي .. وتكون ال cuff بتاع جهاز الضغط مناسبة للذراع يعني مغطية 2/3 الذراع او بالنسبة من 75-80% إلى 100% من الذراع ودي بالنسبة للشخص البالغ العادي
وهكذا
طبعاً زي ما احنا عارفين فيه مقاسات للأطفال والوزن الزائد
.
وتكون ال cuff بتاع جهاز الضغط ملفوفة بإحكام بحيث إنك تقدر تدخل صباعين تحتها ! لكن مش أوسع من كدة
وبلاش تحط تحتها السماعة
السماعة بعيدة عن جهاز الضغط مش تحت ال cuff بتاعته
.
الصور تحت شوفها مهمة جدا
.
يعني قياس الضغط في غالب الصيدليات تقدر تقول أنه غلط 100%
.
يكون المريض هادي يعني مش جاي من سفر ولا تعبان ولا مرهق ولا متخانق يعني تبلغه بكدة علشان دا مهم جداً في تشخيص مرض علاجه مدى الحياة ! ميكونش جعان أوي أو شبعان أوي وميكونش مدخن لسه أو شارب قهوة وهكذا !
.
بلاش تقيس الضغط من على الهدوم إلا إذا كانت خفيفه أوي يعني مش هتمثل عبء ضغط إضافي .. ومتخليش المريض يرفع ذراع القميص او العباية ويخنق بها الذراع من فوق !! يعني الدنيا تكون مريحة جدا
علشان لو خنق بالكم الضيق الجزء اللي فوق
قراءة الضغط هتبقى غلط بالسالب يعني اقل من اللي المفروض تقرأه
.
تقيس في اليمين ولا الشمال ؟!
لازم نقيس في الاتنين وأعتمد الذراع اللي فيه أعلى قراءة بعد كدة حتى في المتابعة ويكون المريض عارف كدة
شوف التفصيل الجاي:
لو لقيت الفرق بين قياس الذراع اليمين والشمال أكثر من أو يساوي ١٥
عيد القياس مرة تانية في الذراعين
لو لقيت بردو نفس النتيجة
اعتمد الذراع الأعلى في القياس والمتابعة
.
لو الضغط كان ١٤٠ على ٩٠ أو أزيد
قيس الضغط مرة تانية في نفس الزيارة
لو لقيت الأرقام في المرة الثانية مختلفة عن الأولى
قيس مرة ثالثة في نفس الجلسة
واعتمد أقل قراءتين تم تسجيلهم
.
لو القياسات كان الضغط ما بين ١٤٠ على ٩٠ إلى ١٨٠ على ١٢٠
يبقى كدة هنبدأ في مراحل التأكد من ارتفاع ضغط الدم
يعني هنعمل إيه ؟!
إما أنك تخلي المريض يقيسه عن طريق الambulatory blood pressure monitoring
ودا جهاز المريض بيلبسه ٢٤ ساعة وبيسجل قراءات عليه وبتاخد القراءات بعد كدة
أو
لو مش متاح ودا الغالب
هتخلي المريض يقيس ضغطه في البيت
Home blood pressure monitoring
ABPM
HBPM
دي اختصاراتهم
.
الأول بيكون كالتالي
على الأقل بيعمل ٢ قياس للضغط كل ساعة تحديداً في فترة الحركة العادية اليومية له يعني مش نايم على السرير !! يعني من الفترة اليومية من الساعة ٨ صباحاً وحتى ١١ بالليل
وبتاخد متوسط على الأقل ١٤ قراءة خاصة الفترة اللي فيها حركة
.
في البيت بيقيس الضغط الصبح وبالليل بنفس الاحتياطات فوق ويقيس الصبح مرتين بين كل مرة ومرة دقيقة ! يعني يقيس دلوقتي وينتظر دقيقة ويقيس تاني ويسجل القراءة
دا على الأقل على مدى ٤ أيام
والأفضل يكمل أسبوع كامل
وقالك كنسل قراءات أول يوم وخد من اللي بعده
.
طيب إمتى أقول ضغط مرتفع ؟!
لو ضغط العيادة ١٤٠ على ٩٠ او ازيد
او ضغط ABPM or HBPM ١٣٥ على ٨٥ أو أزيد
.
دا ملخص سريع جدا للنقطة دي
د أحمد العسكري - بتصرف
#Dr_Abdullah_Vitals
#Medicine #Hypertension
ـــــــــــــــــــــــــــــــــــــــــــــ
#مجلة_عالم_الصحة_والطب
#WHM_Magazine 🩺
