قصه قديمه لها صوره بعد صوره
باقي تفاصيلها بالروح مخفـيّه
أسرارها بين ضلع القلب مستوره
مثل الكنوز اللتي في يد جنـيّه
كانها في بقاع الأرض مقبوره
والكنز ما ينكشف لو راح راعـيّه
خربه قديمه الين الحين مهجوره
سريةً في عيوني صدق سريّه
ماهي على صفحة العشاق منشوره
لأنها وسط صدري ساكنه حـيّه
يامن تدور عليها زيد لك دوره
لأن درب الكنوز اليوم ملويّه
سحرٍ مسجل على جدران مكسوره
طلاسم السحر في جدران سحريّه
هل يكره الشخص شخصٍ كان مأموره
ولا حياته حياة إنسان عاديّه
هل يحزن الطير عن فقدان عصفوره
هل يجرح الطير من هو كان راعـيّه
الشاعر اللي كتب شعره من اشعوره
حط المعاني على قيفان شعريّه
كتبت أبيات والابيات اسطوره
لكن تفاصيلها للناس وهمـيّه
الناس بتقول ما الشعار معذوره
هاذا معه جنّ والثانيه بجنـيّه
ابيات شعرٍ على الصفحات منثوره
صارت حكايا الغرام اليوم مرويّه
حتى ابن زيدون له قصات مذكوره
في حب بنتٍ لها بالشعر حريّه
حكاية الحب فالتاريخ مشهوره
مع بنت حلوه أميره أندلوسـيّه
أراجع اهموم قلبي عند دكتوره
تعالج أسرار فيني شبه مخفـيّه
النفس هاذي من الأحزان مقهوره
والروح من كثرة الأحزان مبلـيّه
