🏁 بداية النهاية 🏁
آخر ترم، آخر شهر، آخر محاضرة، آخر سكشن، آخر نظري، آخر عملي، آخر تجمع لينا، آخر......
كلها جمل إن شاء الله هنعيشها الترم التاني.
عدت الأيام بحلوها ومرها.
معقول خلصنا؟
يدوب نبدأ الترم التاني بعد شوية يقولوا معاكم كويز، معاكم ميد، الأوسكي، الفاينال.
الترم الأخير لينا مع بعض، نحاول نسيب لبعض ذكرى كويسة، نحاول نسامح بعض، لو حد زعلان مننا نصالحه إن أمكن.
شيء مخيف جداً لما تكون تصرفاتك التلقائية بتأذي حد وأنت مش واخد بالك.
➖➖➖➖➖➖➖➖➖➖➖➖
انتهت أيام الدراسة لكن الصداقة مش بتنتهي. عمرنا ما هننسى حد في مرة قالنا كلمة كويسة.
في ناس لما تقول كنت في الدفعة 15 هتلاقي اسمها جه في بالك علطول.
عدت سنين شوفنا فيها مسؤولية مكانتش عندنا قبل كدا. عدت أيام صعبة جداً، تغيرت فيها شخصيتنا وعرفنا يعني ايه "العالم الخارجي"
➖➖➖➖➖➖➖➖➖➖➖➖
هنتفرق وكل واحد هيشوف طريقه، في ناس هتبقى معيدين، وفي ناس كان نفسها تبقى معيدين، لكن للأسف مكانش ليهم نصيب.
الناس اللي هتبقى معيدين إن شاء الله نقول لهم ألف مبروك ، يا ريت منصعبهاش على الناس اللي جاية. في كتير غيركم كانوا يتمنوا يكونوا مكانكم.
أما الناس اللي كانت عايزة تبقى معيدين ومبقيتش، متزعلوش، لعله خير، منعرفش الخير فين.
ممكن نحب حاجة ونفتكر نفسنا مش هنعرف نعيش من غيرها، وكلها شر لينا. ممكن نكره حاجة جداً وشايفين إننا فشلنا، شايفين إننا خسرنا، بس يكون كل الخير فيها، والله يعلم وأنتم لا تعلمون.
➖➖➖➖➖➖➖➖➖➖➖➖
لسه في ترم كامل فرصة نصلح اللي فات؛ لأن الأيام كده كده هتعدي ومش هيفضل غير ذكرى.
تعالوا نخلوه أحلى ترم يعدي علينا.
مش يمكن منشوفش بعض تاني؟
4February 12, 2026 1.2K 1
