المتحدي للوزاري || أ.احمد فوزي

كلمتي بخصوص مظاهرات
خريجي الطبية ،

أدري اليوم المنظر يوجع
تشوف ناس تعبت ودرست سنين،
وبالأخير طالعة تطالب بحقها وتنقمع.
ومن حقك كطالب سادس
تشوف هذا المشهد
وتسأل نفسك: إذا هذا مصير التعب،
أني ليش دأتعب؟
بس لا تخلي وجع اليوم
يسرق منك حلم باچر.
كمل، مو لأن الطريق مضمون،
كمل لأن حلمك يستاهل.
وشغلة دائماً أؤمن بيها
وأريدكم تفهموها: لا تبنون كل آمالكم
على التعيين.
الوظيفة الحكومية طريق
من طرق الحياة، مو الحياة كلها.
اليوم تشوف طبيب صنع اسمه،
ومدرس صار اسمه معروف،
وفنان، ورائد أعمال، وصاحب
مشروع ناجح
هواي من هذوله
ما انتظروا أحد يصنع مستقبلهم،
بدوا من الصفر،
اعتمدوا على نفسهم،
وتعبوا لحد ما صنعوا مكانهم بإيدهم.
فلا تخلي اللي صار اليوم يحبطك،
بالعكس
خليه يغيّر طريقة تفكيرك.
لا تدرس حتى تحصل وظيفة وبس؛
ادرس حتى تبني نفسك،
حتى تصير قوي بعلمك،
وحتى باچر تكون أنت اللي تصنع فرصتك،
مو تنتظرها من أحد.
لا تربط مستقبلك بباب واحد
لأن إذا انسد باب،
الإنسان اللي بنى نفسه
يعرف يفتح عشرة غيره.

إذا جنت طالب خصوصي
وتعثّرت باختبار، سواء
نصف فاينل أو فاينل
أو بأي مادة كانت،
أو جنت طالب يوتيوب
واختبرت نفسك واكتشفت
إنك بعدك مو مضبوط… مو مشكلة.
لا تخلي اختبار واحد
يحكم عليك، ولا درجة
تهز ثقتك بنفسك.
الاختبار مو نهاية الطريق،
الاختبار حتى يبيّنلك
وين ضعفك حتى تلحق تصلحه.
لا تبقى تلوم نفسك على اللي راح،
قاتل على اللي جاي.
حاول مرة، ومرتين، وعشرة…
تعبك اليوم هو اللي راح يصنع فرقك
باچر.
يمكن تتعثر، يمكن تتأخر، ويمكن تمر عليك لحظة تحس بيها
إنك ما راح تكدر… بس تذكّر: الخسارة الحقيقية مو إنك تفشل
باختبار، الخسارة
إنك تستسلم بعده.
شد حيلك،
ارجع لنقاط ضعفك،
واضبطها وحدة وحدة.
ما دام عندك وقت تحاول،
عندك وقت تغيّر النتيجة.
قاتل على درجتك،
قاتل على هدفك،
وقاتل على اللحظة
اللي تلتفت بيها لكل هذا التعب
وتكول:
تعبت… بس وصلت. 🤍