شوفوا اخوان بالنسبة للمناقشة ف هي اسهل شي راح تمرون بي خلال المرحلة الرابعة كلها و راح اوضحلكم ليش و شلون بشكل كلش راح يفيدكم ان شاءالله..
اهم شغلة لازم تكون موجودة بالمناقشة هو فهمكم للبحث نفسه.
اذا چان البحث من كتابتكم مية بالمية ف اموركم ماشيه؛لان كل مره تكتبون بيها او تعدلون راح تركزون اكثر و تفهمون بشكل جيد.
اما اذا چان احد مساعدكم ف هم مو مشكلة كل اللي عليكم تقرونه و تراجعونه زين و تركزون عاللي راح اگوله و ماراح يقل تقديركم صدگوني.
الاسئلة بصورة عامة چنت أشوفها متشابهة حسب وجهة نظري و أغلب الاسئلة چانت هيچ :-
١- شنو اسم عنوان بحثكم.
٢- تكلم عن المقدمة او عن شنو تدور مواضيع بحثكم.
٣- كم چابتر او سكشن موجود بالبحث.
٤- يسألون عن عناوين الفصول.
٥- يسألون اذا چان عدكم جانب عملي او نظري او اكو بحوث بيهن الجانبين ( مثل بحثي ) ،اذا چان بحثكم بي احصائيات على سبيل المثال.
٦- اكو بحوث بيهن ادب و لغة ( هم مثل بحثي ) ف لازم تحفظون اسماء المسرحيات او القصص اللي معتمديهن و عنوان موضوع البحث مثل الدايكسس او الضمائر.
٧- عدكم اهم شغلة بالبحث هو الكنكلوچن او الخاتمة او ملخص البحث هنا مثل منگول الزبدة كلها موجودة بالأخير ف اللي عليكم هو التركيز عالخاتمة و شنو فهمت من البحث و شنو استنتجت اذا حجيتهن راح يصير عند المناقش فكرة انكم فعلاً اللي كاتبين و فاهمين شنو البحث مالتكم.
٨- اكو يسألون عن الاهداء و هذا الشي قليل كلش ف من تهدون البحث خلو شي قصير و معبر و لتاخذون كلايش من گوگل.
* كل هذا اللي حچيته لتخافون منه مادامكم فاهمين.
* البحث ماينحفظ اخوان ابداً ماينحفظ افهم و روح و الامتياز يجيكم ان شاء الله.
اذا نسيت شي طلابنا ماراح يقصرون و اكيد يضيفون على كلامي اذا بي نقص.
ملحوظة // مو كل هاي الاسئلة راح يسألوها الكم بس جمعتهن كلهن حتى تكون عدكم معلومة و اغلب المناقشين يسألون بالزايد اربع اسئلة او خمسة لأن ماعدهم وقت و اعداد الطلاب هواي و هذا الشي من صالحكم..
موفقين يارب، و ان شاء الله كلكم تاخذون الدرجات اللي تردوها ♥️🩶.
