▫️باخیرام پنجرهدن بخش ائلهییر تاری یاغیش
ایچیریر سئوگی ایله گون بویو گولزاری یاغیش
او سوپورگه سوپورن اؤیله کی یورغون دایانیب،
اومودو وار کی یویا کوچهنی، بولواری یاغیش
بیر گولون چئورهسینی شؤوقیله آلمیش قوشلار
ایسلادیر کعبه آرا سانکی او زوّاری یاغیش
بو طبیعت کی بئله والئه ائدیر اینسانی
دولانیب باش چکهنی، رسامی، معماری یاغیش
بو گؤرونتو سویوق احساسلاریمی محو ائلهییر
نئجه کی بایرام آییندا اریدر قاری یاغیش
هر نهیین وارلیغی بیر باشقاسینین وارلیغی دیر
بو گؤیونده ازلیندن یئر اوچون واری یاغیش
دامجیلار یان یانا دوشدوکجه اولور داشقینلیق
سؤندورور مؤجوزهسیله بؤیوک اودلاری یاغیش
کیرلیلیکدن بری دیر، صافلیلیغین سیمگهسی دیر
اوّلیندن بیر اوشاق تک اوزو آغ، آری یاغیش
گل خوسنلاش؛ ماراغینسا اونا باغلانماق دیر
آنلادار زومزومهسیله سنه اسراری یاغیش
گؤروشو سارسیدا بیلمز بیر عؤمور یالنیزلیق
چوخ زاماندیر چون اونون دیل بیلهنی یاری یاغیش.
#سعید_عریان_تپه(گؤروش)
@SheirOcagi
September 3, 2026 145 1
