3
دلل أختكيمكن كتير منكم ما رح كتير يركز على هالنصيحة أو حتى ما يهتملها أو يقرأ ويمشي أو حتى يستهجن هالفكرة.
بس حابة أقلك أنت ك"شب " أختك هي مسؤوليتك، أختك هي حياتك ، حتى لو فكرت عكس هالشي بس صدقًا الأخت هي الوطن الدافي يلي رح يكون مفتوحلك بالوقت يلي كل الاماكن رح تكون مسكرة بوجهك.
هي الحصن المنيع الوحيد يلي بتحسن تتخبى وراه بدون ما تحس بالضعف أو الوهن أو حتى الخجل.
هي المكان يلي بتحسن تلتجئ إليه بالوقت يلي بتحس كلشي مسكر بوجهك.
بس أنت أحسن معاملتها وصدقني رح تكون ألك كل هالاشياء وأكتر .
مافي مانع اذا أنت وراجع عالبيت جبتلها بسكوتة ولو كانت ارخص بسكوتة بتنباع، صدقني رح تنبسط فيها وتحسها أطيب من أي بسكوتة داقتها بحياتها.مافي مانع أنك إذا شفتها زعلانة تقوم تحضنها شوي وتخفف عنها وتكون حصنها يلي بتحتمي فيه بهيك أوقات.مو عيب إذا شفتها ضجرانة تقوم تنزلها شوي تمشي تروح عن نفسها .مو عيب إذا اعترفت فيها قدام العالم وافتخرت فيها انو هي أختك.مو غلط إذا شفتها عم تبكي تقلها دمعتك غالية.ترا الأنثى ما بدها أكتر من هيك ، أعطيها شوية حنان بتحس أنها ملكت العالم كله وبتعطيك أضعاف مضاعفة.
وخاصةً إذا كان هالشخص أخوها!
