الهدف من هادم الكورسات انه جزء منهم مجاني و جزء منهم بسعر كويس يناسب الدكتور الليبي هو دعواتكم للوالدة بالرحمة و المغفرة و زكاة علم جارية لها
طبعاً أنا درت الكورس هدا (و مزال فيه إضافات) كمرجع كامل و شامل لكل طبيب ناوي جراحة و بالذات الجراحة العامة
العنوان الشامل لكل الكورسات المذكورة في الأسفل هو Basics in General Surgery
هادم الكورسات نحب انهم يكونوا جزء في تكوين اي طبيب جراحة في بداية مشواره. الكورسات تفيد كذلك لطلاب السنة الرابعة و الخامسة و تشمل أيضاً الدكاترة الجونيور، أتاتشمنت و الإمتياز
حقيقةً، في بداية مشواري في مستشفى الحوادث بوسليم و في الجراحة العامة، كانوا عندي دكاترة جزاهم الله خيراً كنز و ساعدوني هلبا، و كنت نتمنى يوجد مصدر واحد كافي و شامل يساعدني في البدايات لفهم آلية العمل في المستشفيات، يشفي غليل التفكير في العمليات و الأناتومي و يساعد في قراءة تقنيات التصوير
درت الكورس و ناوي من الله عز و جل انه يفيد كل طبيب ناوي جراحة و يكون جزء منه و يعينه في شغله و يخليه متميز
ضفت في الكورس أهم الأساسيات ياللي يبيها أي طبيب في بداية مشواره كالتعامل مع حالات الإسعاف المختلفة و حالات الOPD، إستخدام الFAST scan و استعمالها، التعامل مع تقنيات التصوير كالCT scan, MRCP و الMRI لحالات الجراحة المختلفة و مستقبلاً على منصة الفاروق حيكون في كورس كامل للتعامل مع الجروح، القدم السكري و تقرحات الفراش و أساسيات الخياطة، غرفة العمليات و الأدوات الجراحية، المناظير و عمليات الlaparoscope و أخيراً الRobotic surgery
بداية بكورس الFast scan
هدا الكورس باذن الله حيخليك تفهم شن المطلوب منك بالزبط، شن تشوف قدامك من أعضاء على جهاز الألتراساوند و كيف تفرق بين الأبيض و الأسود و الرمادي، هدا الكورس مهم جدا لانه يعطيك orientation شامل للتقنية هادي ياللي أنا نشوف فيها أساسية للعمل في ليبيا نظراً لعدم توفر CT scan دائماً في الإسعاف الجراحي
ثانياً، Basics in Imaging
في هدا الكورس حقيقةً أطلقت العنان على نفسي لشرح كل من الCT, MRI, Fistulogram, MRCP, CT angiogramو غيرهم.
كانت عندي صعوبة في فهم هادي التقنيات و كنت نحب نفهم شن كانوا يدوا جماعة الراديو و كنت مانحبش نستنى التقرير. كانت حالات الإسعاف في مستشفى الحوادث لا تنتظر للأسف التقرير و تحتاج معظمها للتدخل السريع فكانت المهارة هادي مهمة جدا في العمل و لإنقاذ حياة المرضى.
في الكورس هدا شرحت أساسيات الCT و كيف تقدر تقراها في أقل من دقيقة في التروما و كيف تشخص بسرعة أهم حالات الإسعاف الجراحي، بعدها، شرحت في الكورس الAnatomy in Chest, Abdomen and Pelvis on CT scan
Bone, soft tissue and lung windows
Coronal, Sagittal and coronal views
Arterial, venous and delayed phases
هادم مهارات نشوف فيهم مهمات جدا في خدمتك في الجراحة و أي حد يبي يفهم أناتومي لابد يعرف يقرا CT.
بعدين قعدت نشرح في CT and Hernia و كيف تشخص و كيف تخدم بالصور و امتى تخدم open و امتى lap و امتى robotic
بعدين شرحت CT angio ياللي نشوف فيه مهم جدا في الإسعاف الجراحي بالذات حالات الstab و الgun-shot و حالات الabdominal aorta
بعدها شرحت الMRCP كاملاً
بعدها Fistulogram و الفرق بينهم
و أخيراً اهم شي في اي surgical MDT و هو الMRI rectal protocol pelvis و كيف تفهم السرطانات منه و امتى تقول هدا جراحة و امتى تقول هدا neoadjuvant
بعدها ماتفهم ياللي فات تجي للمهم و هو Basics in A&E
شرحت فيه الATLS و اهم حالات الإسعاف و الsolid organ injury و كيف تستعمل ياللي استفدت منه فوق في التعامل مع الحالات و من أهمها الabdominal injuries
Liver, spleen and kidney injuries, upper and lower GI bleeding
و غيرهم الكثير ياللي يوصلوا لحوالي اكتر من تلاتين حالة و كيفية تشخيصهم على الCT scan
نسأل الله عز و جل أن يكون هدا الكورس مفيداً لكل شخص ناوي أي تخصص جراحي
شهادة لله حطيت فيه كل جهدي بحيث أي سؤال يخطر على بالك في الجراحة تلقى اجابة ليه و كأني واقف معاك في الإسعاف
تلقوا الكورسات على الرابط في التعليقات
نسأل منكم فقط الدعاء للوالدة بالرحمة و المغفرة
سائلاً الله عز و جل أن يوفقكم جميعاً
