🏭 "АРЫЫЛААХ" ТЭРИЛТЭ НЕФТЕБАЗА, ТЕЛЕВЫШКА ИТИТИИТИН ЫЛЫСТА
Кыстыгы көрсө биир улахан кыһалҕа быһаарылынна. Олохтоох, улуус дьаһалталара үлэлэһэннэр, "Арыылаах" тэрилтэ балаһыанньаҕа киирэн котельнайы оттор оператора суох хаалбыт Нефтебаза, Телевышка олохтоохторо өрө тыыннылар.
Бэҕэһээ киэһэ баһылык Семен Александрович Корякин, "Арыылаах" ООО салайааччыта Алексей Николаевич Тихонов коллегаларынаан, дьаһалта тустаах үлэһиттэрэ бу түөлбэ дьонун-сэргэтин кытта көрүстүлэр. Докумуон чааһыгар, туох үлэ бара турарын, чоххо көһүүнү кэпсэтистилэр, ымпыгар-чымпыгар тиийэ барытын өссө төгүл өйдөтүү буолла.
"Арыылаах" тэрилтэ Нефтебазаҕа эргэ залы котельнай оҥороору сөргүтэ, саҥа үрдэтиллибит теплотрасса тарда сылдьар. Бу объект атыыламмакка, ханна да бэриллибэккэ хаалбыта абырал буолла, дьаһалтаттан көрдөһөөччүлэр бааллара. Манна икки котеллара туруохтаахтар. Телевышкаҕа эмиэ элбэх үлэ ыытыллан холбонууга баран эрэллэр.
Киһи үөрэрэ, сөҕөрө бу тэрилтэ атын котельнайдарыттан, улуус аҕыс нэһилиэгиттэн 20-тэн тахса киһи объектары түргэнник үлэҕэ киллэрэргэ субботник быһыытынан түмсэн түһүнэ сылдьаллар. Бу участок салайааччытынан 2018 сылтан "Арыылаахха" үлэлиир Сергей Валерьевич Степанов анаммыт.
Төһө да субсидия кэлэрин иһин чааһынай тэрилтэҕэ күһүн маннык дьыалаҕа ылсыы улахан толкуйтан, суоттан, түмсүүттэн, үтүө санааттан тахсар. Ону тэҥэ дьаһалталар көстүбэт үлэлэрин киһи ааҕан да сиппэт буоллаҕа.
Антоновкаҕа үлэтин саҕалаан эрэр бу оттук тэрилтэтэ номнуо нэһилиэк общественнай олоҕор кыттыһан турар - мас уустарын күрэҕин спонсордарыттан биирдэстэрэ. Уопсайынан да "Арыылаах" тэрилтэ хайдах сыһыаннаах үлэни ыытарын элбэх киһи бэлиэтиирэ буолуо.
@oktyabrskiy_nas
