10
D-2 TALABALIK VIZASI QOIDALARIDAGI O‘ZGARISH
Amalga kirish sanasi:
2026-yil 3-avgustdan boshlab
Homiladorlik, tug‘ruq yoki 1 yoshgacha bo‘lgan farzandini parvarish qilish sababli universitetdan rasmiy akademik ta’til olgan xorijlik ayol talabalar D-2 vizasini saqlab qolgan holda Janubiy Koreyada yashashni davom ettirishlari mumkin.
ASOSIY O‘ZGARISHLAR
- D-2 vizasi o‘z kuchida saqlanadi.
- Tibbiy sug‘urtadan foydalanish huquqi saqlanib qoladi.
- Viza turini o‘zgartirmasdan, keyinchalik o‘qishni davom ettirish mumkin.
KIMLARGA TEGISHLI?
Homiladorlik,
tug‘ruq yoki 1 yoshgacha bo‘lgan farzandini parvarish qilish sababli
universitetdan rasmiy akademik ta’til olgan xorijlik ayol talabalar. (Oldingi nizom bo'yicha homiladorlik sabab ham akademik ta'til olinsa 14kun ichida Koreyadan chiqib ketishi kerak edi.)
RUXSAT ETILADIGAN MUDDAT
Koreyada qolish muddati ko‘pi bilan 1 yilgacha uzaytiriladi.
Agar 1 yildan ortiq akademik ta’til zarur bo‘lsa, viza turini o‘zgartirish yoki o‘z mamlakatiga qaytib, tegishli shartlar bajarilgandan keyin Koreyaga qayta kirish kerak.
TAQDIM ETILADIGAN HUJJATLAR
- Homiladorlikni tasdiqlovchi ma’lumotnoma
- Bolaning tug‘ilganlik haqidagi guvohnomasi
- Bolaning sog‘liq daftarchasi
- Oilaviy munosabatlarni tasdiqlovchi hujjat
- Universitetdan akademik ta’til olganlik to‘g‘risidagi ma’lumotnoma
E’TIBOR BERING
Agar akademik ta’tilga chiqish vaqtida vizaning qolgan amal qilish muddati 1 yildan ortiq bo‘lsa, yashash muddati 1 yil qilib belgilanadi.
Bunday holatda viza muddatini o‘zgartirish uchun qo‘shimcha davlat boji olinmaydi.
📌 Eslatma:
Ushbu ma’lumot hozircha alohida rasmiy hujjat yoki e’lon shaklida HiKorea saytiga joylashtirilmagan. 1345 Immigratsiya maslahat markaziga qo‘ng‘iroq qilib, ushbu tartib bo‘yicha og‘zaki ma’lumot olish mumkin.
HiKorea saytida nima sababdan e’lon qilinmaganini so‘raganimda, bu ma’lumot ularga ham ichki tartibda taqdim etilgan material (내부 자료) ekanligi haqida javob berildi.
Shunga qaramay, ushbu tartib bo‘yicha tegishli hujjatlarni tayyorlab, immigratsiya idorasiga ariza topshirish mumkin.
※ Ariza topshirishdan oldin o‘z holatingiz bo‘yicha 1345 orqali yana bir bor aniqlashtirib olish tavsiya etiladi.
