نعي جنوبي
حنيت لبن امي وريده
وممشاي لدروب البعيده
والصار موبيدي وبيده
ونيت محد سمع وناي
وين اليحبني ينعه وياي
زينب انه وبولية اعداي
محتاره حيل بهل يتامه
والسوط بمتوني علامه
جاوينهم اهل الجهامه
آه الشام بعد ايام بيهه
ندخل ونتلوع بديهه
واعياد سوت اهاليهه
براس السبط كامو يهنون
ويزيد كالب عيد بلكون
وبدمنا طوايفهم يحنون
محد عرف صيت النشامه
وشيخ العشيره ياندامه
راسه بطشت تلعب خزامه
علي بويه علي بويه
بويه علي لو شفت حالي
ضيم التشوفه والجرالي
بديوان طباني الضلالي
جيتك يبويه بخبر ميشوم
دخلوني ديوانهم هالكوم
وانه الجنت بيه يحلفون
بت حيدر ومعروف صيتي
بويه علي هجمولي بيتي
وانت الگلت بتي بحميتي
اهل الفتن واهل الضلاله
ياعلي ومن اقذر سلاله
نخيتك ياحماي الكفاله
تحظرني بويه وليه تفزع
گلبي من الجمات يطلع
وانت علي لحالي تنوع
يزيد بويه يزيد هاذا
نال بجتل أبنك مراده
راسه بطشت سيد الساده
ـــــــــــــــــــــــــــــــــــــــــــــــــــــــــــــ
🖇تـمــت بتـــوفيــــق الله
🖊بـٲنامــل شاعرة ٲهـــل البيت عليهم السلام
زهـــراء الحــــربي
وغير مبري الذمه ٲمام الله واهل بيت محمد((ع)) من يحذف الاسم وينشرها ٲوينسب القصيده لــنفسه 🚫
💬ونسال الله التوفيق والقبول
وٲسالكم الدعاء👆
https://t.me/ECYULhLFeQ2NTYy
