نصيحة لكل بنت لم تتزوج بعد ..
إذا جآءك رجل لايخالط النساء ولايمازحهن، ولايُكثر الحديث عنهن ولو كان واعظًا في كل حين وحين، وقّاف عند حدود الله في الحتة دي تحديدًا استخيري واقدمي ولاتترددي فيه أبدًا!
أقول لك بصيغة مبالغة؟
ماتسألي ذاتو عنه!
عارفة ليه دي تحديدًا؟
عشان دي وأي حاجة تاني حتسألي عنه فيها حترضيك!
والله دي في زمن الفتن النحن فيه دا صعبة صعبة شديد، وكم زلت فيها أقدام - أسأل الله السلامة- وافتتن بها رجال دين، والزول البخاف الله في الحتة دي ودي حته سِر ماساهل!
يعني ماممكن يتظاهر بها أبدًا، زول التلفون في يده قادر يشوف ويتفرج ويتونس ويصاحب ومافي حد يعرفه، وماأسهل مبررات الشيطان، دي بت أهلك فعادي، وإنت شيخ ودي زولة بستفتي، لكنّه دائمًا يختار الله ومخافته دا زول ماهيّن!
والحاجة دي بتظهر في كلامه وتصرفاته وبتظهر في باقي عبادته والله!
مستحيل شخص ذي دا تلقاه زول سيئ!!
وسبحان الله شوفي قروبات البنات، كلها استشارات تبدها لك بزول صلاي وملتحي وملتزم لكن الكلام البينهم في جهة والإلتزام في جهة تانية وهي لاتحل له أصلا، يعني كلام في الحلال ذاتو تقيل على شخص ملتزم تخيل وهو مابينه وبينها شئ!!
فأبدًا غص البصر والبعد عن مخالطة الرجال النساء والنساء الرجال أبدًا ماحاجة بسيطة وأثرها محصور على الحتة دي براها، والله لتظهر في عبادة الرجل وفي عبادة المرأة، وقد يُحرم العبد عملا صالحًا دام عليه طويلا بسبب تجاوزٍ بكلمة، وإنّك لتراها في تقاسيم الوجوه!
كم أخفى أناس عن الناس عباداتهم وأظهرها الله في تقاسيم وجوههم وجلي كلامهم وعباراتهم!
والكلام كذلك للنساء المجاهدة في الباب دا تحديدًا وحته إنّها تدقق في أدق التفاصيل في معاملاتها مع الرجال دي بإذن الله حتخاف الله فيك شديد!..
لكن ذلك في الرجال أشد!..
عشان النبي حذر مِن فتنة النساء ..
وعشان الله سبحانه في مقدمة الشهوات ذكر تزين النساء للرجال ..
فاللهَ اللهَ في زمن كثر فيه التدين ظاهرا، والتسمي باسماء العلماء والتشبهم بهم وتجد الرجل جوفه جائع لمخافة الله في سره، وهو مِن أهواءِ النساء تكاد لاتجد في قلبه موضع قدم!
ف اللهَ اللهَ في مخافة الله بغض البصر وحفظ اللسان وعدم المخالطة إلّا في الضرورات!..
والسلام!
# مِن الأرشيف
#ترتيل_الخزين
July 6, 2026 50
