وصلت رسالة جديدة 💌
اريد اكول كم شغلة اذكّر نفسي بيها ضروري؛
رغم الود والمعاملة الحلوه اللي كانت بينج وبينه إلا إنج جنتي ماتحبي، وتدرين انه ماعندج مشاعر تجاهه، ولا شيء من هذا القبيل
أدري حاولتي تحبيه بكل قواج العاطفية لكن سبحان الله جنتي تنفرين منه بداخلج مهما أظهرتي له التودد، رغم جنتي معجبة بيه بس يبقى إعجاب مو أكثر، وحقج ما ألومج لأن هو مُمثل بطبعه وعرف شلون يخدعج ويوهمج بأنه هو الرجل المثالي وماكو أحسن منه بهل دنيا ف انتِ -على سذاجتج وقوة إعجابج بهالشخص- توهمتي بأنج تحبيه وعاشقة له
بينما هو جان يضحك عليج وعلى سذاجتج ويقضي وياج وقت وعنده عشرة غيرج وكلهن يكول لهن نفس الكلام المعسول اللي يكوله الج ويخدعج بيه..
وبما انه هو أول شخص عرفتيه بحياتج من الرجال وجنتي على وشك الوقوع في حبه لولا لطف الله ورحمته بيج فأكيد تأثيره عليج ماكان سهل ولا حيكون
كونج قليلة خبره بهذي العلاقات ومتعرفين شلون تتصرفين ووكعتي بواحد عكسج تماماً وانصدمتي بيه فهاي كُلها صعبة عليج بس مو مستحيل تتخطين وترجعين لحياتج وتسمحين لنفسج تعيش حُب حقيقي ونقي
اتمنى تسامحين نفسج وتغفريلها هالذنب اللي هو مو ذنبها اساساً وتعيشين حياتج طبيعي، مثلما هو عايش حياته رغم تعدد علاقاته ويطلع ويتونّس ويسافر وينشر ويتغزل بالرايحة والجاية ومامهتم لأي شي
انت صيري أحسن منه وحبّيها لنفسج واحتويها وصونيها وادعي الله يرزقج بإنسان حقيقي وطيب مثلج تمضين وياه بقية حياتج وبالج مرتاح
بالنهاية أحبج وأبداً مراح أسمح لأحد انو يؤذيج ويقلل من شأنج، مراح أسمح لروح ملوثة تدنو من روحج النقية وتعكّر صفو قلبها ومن ثم تتركها وترحل غير مبالية.
اليوم تعلمنا من هل تجربة وصرنا كبار على هل أمور فالحمدلله دائماً وأبداً
٢٠٢٦/٨/٢٢