لتخدعون أهلكم لأَي سبب، لتوهّم أهلك أن أنت تدرس بغرفتك، بينما أنت لازم التلفون، و مخلّص وقتك على الأنترنت، و تتركهم، يخدمونك، و يوصلولك كل حاجاتك لباب غرفتك.
لتوهمين أهلچ بشخصيّة، و ملابس، و وجه، يختلف عن إلّي شايفي، بمجرّد ما تروحين لمكان هُمَّ ما موجودين وياچ بي، خصوصًا الجامِعَة.
لتوهمون أهلكم بصلاحكُم، و ترسمون إلهم صورة مثاليّة، و تخلّوهُم يتوقعون منكم كلّ الخير، سواء تفوّق بالدراسة، أو على مستوى السمعة، و الأخلاق.
من تدري بأبوك، مستعد يدفع، و مستعد يصرف، و يوصلك للمكان إلّي تريده، لتستغل هذه النقطة، و لا تحاول تصير نُسخة من اصدقائك، على مستوى نمط، و معيشة، تقبّل و افهم اختلاف المستويّات الماديّة. إلّي يشتريه، و يلبسه صديقك، مو بالضرورة أنتَ هم تگدر تشتري، و تلبس مثله. من يكون مستواك المادّي أقل؛ اقنع، و تقبّل، بس لتجبر أهلك يجيبولك شي يتجاوز قدرتهم. تعلّم تقتنع بالموجود.
خليّكم واضحين، مقتنعين، متقارنون. خلّوا أهلكم سبب، و وسيلة لتغيير شخصيّاتكم، و امتناعكم، عن أي فعل خطأ، سواء بوجودهم، أو بغيابهم، و بغيابهم أهم. كلما راعيتوهُم، كلما خففّتوا عنهم، كلما تقبّلتوا برحابة صدر، أي شي ما گدروا يوفروا، رح تتوفّقون، مُراعاة الأهل، و المحافظة على نفسكُم بغيابهم، و وضوحكُم وياهُم، أقصر طريق تكسبون بي كلّ التوفيق.
-هالة الجبوري
2
2
1February 18, 2025 5.8K 4
