علم المنطق: post #2059 — TG.ME

تقرير في علم المنطق الترادف والتباين والتقابل بدايةً، الألفاظ من ناحية معانيها تنقسم بشكل عام إلى ترادف وتباين. الترادف يعني تكون عندنا كلمتين مختلفات باللفظ، بس معناهن واحد أو قريب جداً من بعض، مثل: أسد وليث، أو إنسان وبشر. يعني نغيّر الكلمة، بس المعنى يبقى نفسه تقريباً. التباين فهو العكس، يعني كل كلمة إلها معنى يختلف عن الثانية، مثل: كتاب، قلم، سماء، أرض. كل وحدة من هاي الكلمات تدل على شيء ومعنى مختلف. ومن التباين عدنا المتخالفان والمتقابلان. المتخالفان: يعني شيئين مختلفين بالمعنى، بس عادي يجتمعن بنفس المكان والوقت، مثل الإنسان والفرس، أو الماء والهواء. فهما مختلفان، لكن ماكو مانع يكونن موجودين سوا. المتقابلان فهما شيئين بينهما تقابل، يعني ما يكدرن يجتمعن من نفس الجهة وبنفس الوقت. والتقابل إله أربعة أقسام: 1- التناقض: يعني إثبات الشيء ونفيه، مثل إنسان ولا إنسان. ما يصير الشيء نفسه يكون إنسان وغير إنسان بنفس الوقت ومن نفس الجهة. 2- الملكة وعدمها: مثل البصر والعمى. يعني عندنا صفة ممكن تكون موجودة بشيء، وممكن تنعدم عنه. مثلاً الإنسان ممكن يكون بصيراً وممكن يكون أعمى. بس ما نكدر نقول الحجر أعمى؛ لأن الحجر أصلاً ما عنده قابلية يكون بصيراً. 3- التضاد: يعني صفتين متعاكستين، مثل الحرارة والبرودة، أو السواد والبياض. الشيء نفسه ما يكدر يكون حار وبارد بنفس الوقت ومن نفس الجهة. 4- التضايف: هذا يكون بين شيئين، بحيث إذا ذكرت واحد منهم لازم يكون الثاني موجود وياه، مثل الأب والابن. إذا أكو أب، فلازم أكو ابن، وإذا أكو ابن، فلازم أكو أب. وكذلك العلة والمعلول.