علم المنطق: post #2058 — TG.ME

تقرير علم المنطق - منطق المظفر تقسيمات الألفاظ قبل لا ندخل بالأقسام، لازم نعرف شغلة. المنطقيون قسموا الألفاظ حتى يعرفون كل لفظ شلون يدل على معناه. يعني أكو ألفاظ تدل على معنى واحد، وأكو ألفاظ تدل على أكثر من معنى، وأكو ألفاظ تغير معناها مع مرور الزمن. لذلك قسموها إلى خمسة أقسام. أولاً: المختص المختص هو أسهل قسم. معناه أن الكلمة تدل على معنى واحد فقط، فإذا أسمعها أعرف المقصود مباشرة وما أحتار. مثل كلمة حديد أو حيوان، فهذه الكلمات إلها معنى واحد معروف. ثانياً: المشترك المشترك عكس المختص. يعني الكلمة الواحدة إلها أكثر من معنى. لكن هاي المعاني كلها أصلية، مو واحد منها مأخوذ من الثاني. مثل كلمة عين، مرات نقصد بيها العين اللي نشوف بيها، ومرات نقصد عين الماء، ومرات نقصد الذهب. لذلك حتى أعرف المعنى الصحيح لازم أشوف الجملة أو الكلام اللي انذكرت بيه. ثالثاً: المنقول المنقول هو لفظ كان له معنى بالأصل، وبعدها انتقل إلى معنى جديد بسبب وجود علاقة بين المعنيين. مثلاً كلمة الصلاة، بالأصل كانت تعني الدعاء، وبعدها صار الشرع يستعملها للعبادة المعروفة. يعني المعنى تغير، لكن أكو علاقة بين المعنى القديم والجديد. رابعاً: المرتجل المرتجل قريب من المنقول، لكن الفرق أن اللفظ انتقل إلى معنى جديد بدون أي علاقة بين المعنيين. ولهذا أكثر المرتجل يكون بأسماء الأشخاص. خامساً: الحقيقة والمجاز الحقيقة هي أن نستعمل الكلمة بمعناها الأصلي. أما المجاز فهو أن نستعملها بمعنى آخر، لكن لازم تكون أكو علاقة بين المعنيين، ولازم تكون أكو قرينة حتى نفهم أن المقصود مو المعنى الأصلي. مثلاً إذا أگول: رأيت أسداً في الغابة، هنا المقصود الحيوان، فهذا استعمال حقيقي. أما إذا أگول: رأيت أسداً يقاتل في المعركة، فهنا ما أقصد الحيوان، وإنما أقصد رجلاً شجاعاً، فهذا يسمى مجازاً