📝 عزیز نادری : 🔻
بیا جور دیری وِ بارِم نکو
قِرارِم تونی بیقِرارِم نکو
✾
سِتارِم نِمییرَ گِری بی چَشِت
چِشیاتِ نَوَن بی سِتارِم نکو
✾
نِمیینی مَگر گِز بُوریمَ وِ در
اسیرِ غم انتظارِم نکو
✾
مِ چی بید حُشکِم بهارِم تونی
بِهارِم بیا بی بِهارِم نکو
✾
دِلِم پِرچَ شَرِش میا بعد تو
گرفتار ای شَر دِ بارِم نکو
✾
بالا غیرَتِت وختی پی بُردییَ
مِ تونا جَفایاتِ نارِم، نکو
✾
مِ او کِشتِ دیمم تو اور بِهار
بوار وُ بوارِم،نَوارِم نکو
✾
وِ شوق وفا تو میها گُل بَکِم
دِ ترس جَفا خارِ زارِم نکو
✾
قبولَ تو صیاد وُ صیدِت مِنم
ولی تا بِهارَ شکارِم نکو
✾
هوا سردَ تاریکَ بارونیَ
وِرَز یَ که بَن بیارَ تارِم نکو
✾
میترسِم دُچارِت بَکَ چرخ پیر
وِ درد سَوایی دُچارِم نکو
✾
بیا دَس بَکَش دی سِتَم کردِنِت
چِنی شُو کِز روزِگارِم نکو
✾
خُتِ بُو وِ در تا دِلِم وا بُؤَ
وِ مِنَّت کَش هشتِ چارِم نکو
✾
بَگیسِ چراغی دِ مالگِه "عزیز"
گِرفتار شوگارِ تارِم نکو
🔗 @AzizNaderi | تش دل
16July 21, 2026 551 4 6
