ماشه بَکَش سینه سِپَر کِردِمَ
سینه یی پُرکینه سِپَر کِردِمَ
❁
هام سَرِ پا تا نفسِ آخرِم
بوُ اَجل های وِ کجا، حاضرم
❁
ها چی بَوازِم که دِ قیدِش بُؤم
فرخی مگر دارَه بُؤِم یا نُؤِم؟
❁
کس چی مِ ویلونِ وِلاتِت نِوی
شاه دلِ کَس چی مِ ماتت نِوی
❁
حردِن وُ چَردِن میوه باغِ تونِ
هیشتِن سی روح مِ داغِ تونِ
❁
جُرم تو دِ حد وِ دَرَ بی خوَر
چونی که چَن ساله مِنِ جو وِ سَر
❁
آه وِ درگاه خدا می کَشِم
جُرم گُنایا تونِ ها می کَشِم
❁
کم سی دلِم ریحونِ بی گُل بَکار
مَر نونی سَختَ چنی انتظار؟
❁
کِی مِ دیَه چینه کُنِم دُ نَپاش
دُنِتِ بیخود وِ دَر وُ بو نپاش
❁
پُخته فلک همدَمِکی خُمِتِ
وا چَشِ خُم دیمَ بَنِ دُمِتِ
❁
آینه کشتِم ایقه وِم گُت بَمیر
ور کِ تَشی تا که چی ققنوسی پیر
❁
بال زِنو جونِ خُمِ تش دِیِم
تَش دِ خُم وُ روحِ منت کَش دِیِم
❁
آخر عمر یَنِ که زِیشَ وِ بیز
سیل کِن وُ وا مسخره بُو ای " عزیز"
❁
جورِ شناختی دِ تُرِ عشقِ دوس
عمرِت باختی دِ تُر عشقِ دوس
✦فرخی: فرقی
✦دُ نپاش: دانه نپاش
✦دُمِت: دامَت
✦زِیشَ وِ بیز: حیف و میلش کردی.
❀✦•┈❁عزیز نادری❁┈•✦❀
•┈❁پریسکه خیال❁┈•
🍃🌸join👇🏻
°•🌸 @AzizNaderi 🌸•°
23
3
3June 22, 2026 1.5K 36
