مساء الخير يا جماعة 🌹
اليوم رح أحكي بشغلة بعيدة شوي عن المونتاج والهندسة الصوتية، لكنها من أهم الأمور اللي بتخص أمان حساباتنا.
أكيد كثير منكم لما يسجل دخول على فيسبوك أو أي تطبيق ثاني بتطلع له رسالة: "بدك نحفظ كلمة المرور؟" سواء على جوجل أو على السحابة أو على الجهاز نفسه. وبصراحة أنا من الناس اللي ما بنصح بهالموضوع نهائي.
صحيح إنه بيريّحك وما بخليك تكتب كلمة المرور كل مرة، لكن لو لا سمح الله صار أي اختراق للجهاز أو وصل شخص لحساب جوجل تبعك، أول مكان غالبًا رح يدور فيه هو كلمات المرور المحفوظة. وإذا لقاها كلها جاهزة، بتكون اختصرت عليه مشوار طويل وسلمته مفاتيح حساباتك بإيدك.
عشان هيك، حاولوا قدر الإمكان ما تحفظوا كلمات المرور على جوجل أو السحابة أو أي تطبيق مخصص لحفظها داخل الهاتف، وخلو معلوماتكم الحساسة بعيدة عن أي مكان ممكن يوصل له شخص ثاني.
ديروا بالكم على حساباتكم، لأن دقيقة احتياط اليوم ممكن توفر عليكم مشاكل كبيرة بكرا. 🔐📱👍🏻 #الاعلامي_علاء_عماد
