ياماي ويانه بعد مالك وجه ياماي
موهاي المرجيه منك لا ابد موهاي
شحيت وانته بعازتك جانت خيم
ضدنه صرت حالك مثل حال السهم
مامنكسر گلبك على مناشغ طفل
تروي اجاك ورجعيته ابوجها دم
ياماي لو عندك گلب
تخجل ندامه وماتصب . وحسين ضامي
ياماي ميفيد العذر
يالطيحت حامي الخدر . وماضل محامي
ويلاه يابت علي ويلاه يابت علي
،،،،،،،،،،،،،،،،،،،،،،،،،،،،،،،،،،،،
يانار ماينفع وياج العتب يانار
ماصار ويانه سويتي القبل ماصار
تعرفيني بتمن انه يا نار الغدر
بنت الحرگتي جفوفها بذاك الكسر
يانار اجيتي ويالجمع ذاك الوكت
واليوم اجيتي اعله الخيم بيد الشمر
يانار مابسج حرگ
شتردين من عدنه صدگ . يوميه لجمه
يانار طيحتي الخيم
حرگيتي باب اهل الشيم . والدنيا ضلمه
ويلاه يابت علي ويلاه يابت علي
،،،،،،،،،،،،،،،،،،،،،،،،،،،،،،،،،،،،
ياليل يالذابح احلام الصبح ياليل
ياحيل ياراحه ضلت بالگلب ياحيل
يالكاسر جناح الضوه بوحشه وقهر
وما كلفيت انجومك اتشيل الگمر
لاگمره طلعت لاشفت دربي وعلي
ضلمه وادورلي ضوه فوگ النهر
ياليل وحشه بطلعتك
اي والله تذبح شوفتك . ماشوفه دربي
ياليل يمعثر الجدم
كل ساعه بجروح انصدم . شيصير گلبي
ويلاه يابت علي ويلاه يابت علي
،،،،،،،،،،،،،،،،،،،،،،،،،،،،،،،،،،،،
ياموت شو ما اجيت اشعطلك ياموت
بلا صوت امنيتي ميته بخيمتي بلا صوت
ياريت ميته ابكربله موتت غصن
ولاتبقه روحي وحشه من هاذ الحزن
جن مگبره ويدخلها بالمغرب بشر
مجويه عيني بدمعتي وذاب الجفن
ياموت عني شعطلك
ستعجل عليه توسلك . ماريده عمري
ياموت ماتسوه تره
صارت حياتي مگبره . ومايهده كسري
ابوفايز الرافضي
