قصيدة لمصاب رسول الله مُحمّد (صلى الله عليه وآله) فاطمـــه تودع… — سيد زيد الفحام

سيد زيد الفحام@zaidzai · 15.9K subscribers Open in TelegramOpen

قصيدة لمصاب رسول الله مُحمّد (صلى الله عليه وآله)

فاطمـــه تودع ابوها.
تدري بعــده يعذّبوها
لو رحل يستضعفوها.
تبچي وتنوح
تبچي وتنوح
..................

فاطمه بتمن يعالم بت مُحمّد
مدلله بجاله ولا يهضمهه احّد
تشوف ابوها الهادي بجروحه تمدد
الليله ودّع فاطمه الهادي وتشهّد

گبل لحظات المنية
ودّع الزهره الزجية
وستعـــدّت للأذيـة
تبچي وتنوح
تبچي وتنوح
..................

بحجر حيدر خلّه راسه سيد الناس
ظل يواسي الزهره بنته بآخر انفاس
تگلّه بويه خلاف عينك بيتي ينداس
وحيدر تچتفه الوصية وماكو حراس

تهجم اصحابك علينه
والوصي محّد يعينه
لو عفتنه شلون بينه
تبچي وتنوح
تبچي وتنوح
..................

گلهه يابنتي الوديعة ادري ينصاب
ظلعچ وطفلج توگعه دفعـة الباب
ذوله مو اصحابي للشيطان اصحاب
منهم اتبرّه وعليهم باچر حساب

صبري يابنتي الحبيبه
من تحل بيچ المصيبه
صارت ايامـچ قريبـــه
تبچي وتنوح
تبچي وتنوح
..................

غمضت عيونه حبيب الله ونبيّه
بحجر حمّاي الحمه حيدر وصيّه
طاحت عليه فاطمه بذيچ المسيّه
تبچي وتنادي يبويه شلون بيّه

شبگته وشتد ألمهه
وحيدر يصبّرها يمهه
والحزن اكثر هضمهه
تبچي وتنوح
تبچي وتنوح
..................

غسّل المختار حيدر بيده ويلاه
فاطمه تبچي عله ابوها وتنحب وياه
گبل لا يدفن مُحمّد طه وصّاه
خل تودعه الزهره بنته بدمعة الآه

صوّبت گلبي بمصابك
عمري ماريده بغيابك
اندفـن ريت بتـرابــك
تبچي وتنوح
تبچي وتنوح
..................

تدري بصحابك بعد عينك يغدرون
بويه نكروها وصيتك ما ينفذون
عالخلافه اجتمعوا لغيرك يطيعون
عافوا الكرار طاعوا ايـد ملعون

هجموا علينه بحقدهم
بس علي ويگدر يردهم
لكن لأمـرك تـركــــــــهم
تبچي وتنوح
تبچي وتنوح

سيـد زيــد الفحـام
__________

t.me/zaidzai/14224 Translate