قصيدة في رثاء رسول الله محمد صلى الله عليه واله
يارسول الله وحبيبه
ياعُظم هاي المصيبه
...........
يارسول الله مُحمّد يانبينه الغالي
الله خصّك بالنبوّه يالمقامك عالي
فضلك عله الأمّه واضح انت نِعمْ الوالي
تالي ما حفظت وصيتك من عفتهم تالي
اذّتك هاي العجيبه
ياعُظم هاي المصيبه
.............
عترتك وصّيت بيها تنحفظ بغيابك
علي والحسنين ومهم عترتك وحبابك
تالي ظلموهم يطاها من غبت بترابك
حرگوا الدار عله هلها ونار تسعر بابك
اذّوا الزهره الحبيبه
ياعُظم هاي المصيبه
..............
تهجر يگولون عنك چي ردت توصيهم
بعدك الكرار والي وهذا ما يرضيهم
يدّعون اصحاب لكن انت تعلم بيهم
تبعوا الطاغوت وسفه وعافوا اليهديهم
امست العترة غريبه
ياعُظم هاي المصيبه
..............
بس علي الكرار يمك يانبينه تشوفه
حاضر بساعة وفاتك چفّك عله چفوفه
للسقيفه الناس راحت عالطمع ملهوفه
بايعت واحد خليفه والأمير تعوفه
بعدك المحنة عصيبه
ياعُظم هاي المصيبه
...............
فاطمه الزهراء تبچي من غبت ظلموها
ويلي خلف الباب لاذت سيدي وعصروها
طاح محسنها يطاها وبالصدر صابوها
فوگ كل هذا يويلي عالوجه سطروها
ظلموا المنّك قريبه
ياعُظم هاي المصيبه
سيد زيد الفحام
_____
7
1August 7, 2026 3.7K 161
