نزله لمصاب رسول الله محمد ( صلى الله عليه وآله)
فاطمه تصيح بالدمع واسوني
...............
راح ابويه الغالي.... يالتسمعون
بالدمع واسوني...... لا تقصرون
فاطمه گلبي انجرح يحبابي
وينه وينه المنفجع لمصابي
ارد اشوفه ونظر لدمعاته
اكتب اسمه فاطمي بكتابي
ضلعي مكسور. باللطم عينوني
فاطمه تصيح بالدمع واسوني
...............
مو سهل ياشيعه..... جرح لفراگ
لوالدي وعيونه....... روحي تشتاگ
غمّض عيونه الحبيب الغالي
مات ابويه المصطفه اليبرالي
كلها ضدنه تجمّعت اصحابه
ومارضو حيدر يصير الوالي
گلبي ملچوم شيعتي وبچّوني
فاطمه تصيح بالدمع واسوني
...............
چم جرح بغيابه..... يلچم الروح
ما يفيد جروحي.... دمعي والنوح
انصبّت علية المصايب كومه
فاطمه آنه وصرت مهضومه
باجر الاصحاب تحرگ داري
من عزيزه تحوّلت مظلومه
تنزف دموم وي دمعها عيوني
فاطمه تصيح بالدمع واسوني
...............
بالسقيفه جتمعو.... ضد ابوحسين
حاير بلا ناصر..... ناصر الدين
بايعو غيره ونسو افضاله
والنبي لمن رحل اوصاله
عصو امر الله ورسوله الهادي
ياعلي اصبر وحي اوحاله
شيعتي وياي. ابچو لا تنسوني
فاطمه تصيح بالدمع واسوني
...............
أنـدفـن بتـرابه..... والدي وغاب
دنيا ظلمه بدونه...... دمعه ومصاب
ريت وي جسم النبي دفنوني
ولا اظل بالدنيا ويظلموني
ينكسر ظلعي ويطيح اوليدي
ويلي خلف الباب لو عصروني
عمري مأسات ابچي دم خلّوني
فاطمه تصيح بالدمع واسوني
سيد زيد الفحام
___
3
1August 7, 2026 4.1K 220
