የወርቃማው ሰኞ የክብር እንግዳ ወ/ሮ ሮማን ጎበና ልምድና ተሞክሯቸውን አካፈሉ
በየካቲት 12 ሆስፒታል ሜዲካል ኮሌጅ በተካሄደው የ“ወርቃማው ሰኞ” መርሃ ግብር፣ በተቋሙና በተለያዩ ተቋማት ለሀገራቸው በትጋት፣ በብርታት፣ በቅንነትና በታማኝነት ሲያገለግሉ የቆዩት ወ/ሮ ሮማን ጎበና የእለቱ የክብር እንግዳ ሆነው ተጋብዘዋል።
በመርሃ ግብሩ የሆስፒታሉ ዋና ፕሮቮስት ዶ/ር አበበ ታደሰ፣ የአስተዳደርና ልማት ምክትል ፕሮቮስት አቶ አለሙ ክብረት፣ የሕክምና አገልግሎት አሰጣጥ ምክትል ፕሮቮስት ዶ/ር መአዛ ሮሪሳ፣ የአካዳሚክና ምርምር ምክትል ፕሮቮስት ዶ/ር ዱቤ ጃራ፣ የአበበች ጎበና እናቶችና ሕጻናት ማዕከል ዳይሬክተር ዶ/ር ወገኔ አሰፋ፣ ሌሎች ዳይሬክተሮች፣ የኬዝ ቲም ኃላፊዎችና የተቋሙ ሠራተኞች ተገኝተዋል።
የመርሃ ግብሩን የመክፈቻ ንግግር ያደረጉት የአበበች ጎበና እናቶችና ሕጻናት ማዕከል ዳይሬክተር ዶ/ር ወገኔ አሰፋ፣ “ወርቃማው ሰኞ” ሰፊ የሥራ ልምድና የሕይወት ተሞክሮ ካካበቱ ሰዎች ብዙ ትምህርት የሚገኝበት መድረክ መሆኑን ገልጸው፣ በመርሃ ግብሩ ላይ በመገኘታቸው ደስተኛ መሆናቸውን ገልጸዋል።
በመቀጠልም የእለቱ የክብር እንግዳ ወ/ሮ ሮማን ጎበና የሥራ ሕይወት ልምድና ተሞክሯቸውን ለተሳታፊዎች እንዲያካፍሉ በዶ/ር ወገኔ አሰፋ አማካኝነት ወደ መድረኩ ተጋብዘዋል።
ወ/ሮ ሮማን ጎበና በወለጋ ደምቢ ዶሎ ተወልደው ያደጉ ሲሆን፣ የመጀመሪያና የሁለተኛ ደረጃ ትምህርታቸውንም በደምቢ ዶሎ ከተማ ተከታትለዋል። በሴክሬቴሪያል ሳይንስ ዲፕሎማቸውን ከዩኒቲ ዩኒቨርሲቲ ያገኙ ሲሆን፣ በማኔጅመንት የዲግሪ ትምህርታቸውንም ከዚሁ ዩኒቨርሲቲ አጠናቀዋል።
የሥራ ሕይወታቸውን በ1986 ዓ.ም በጋምቤላ የተፈጥሮ ሀብትና አካባቢ ጥበቃ ቢሮ በመቀጠር የጀመሩት ወ/ሮ ሮማን፣ በተለያዩ ወቅቶች በጡረታ ቢሮና በከተማ ልማት ዘርፍ አገልግለዋል። በ2009 ዓ.ም ደግሞ የካቲት 12 ሆስፒታል ሜዲካል ኮሌጅን ተቀላቅለው፣ በበጀት ክፍል ዳይሬክቶሬት ዳይሬክተር በመሆን እያገለገሉ ይገኛሉ።
ወ/ሮ ሮማን በመድረኩ ላይ በሥራ ዘመናቸው ያሳለፉትን ልምድና ተሞክሮ በማካፈል፣ የዕቅድና በጀት ሚና እና አስፈላጊነት ላይ በማተኮር ከሥራ ሕይወታቸው ያጋጠሟቸውን መልካምና አስተማሪ አጋጣሚዎች አካፍለዋል። የረጅም ዓመታት የሥራ ልምዳቸውን በማጣቀስም ለተሳታፊዎች የሥራ ሥነ ምግባር፣ ተጠያቂነትና ታማኝነት ያላቸውን ሚና አስተምረዋል።
የአካዳሚክና ምርምር ምክትል ፕሮቮስት ዶ/ር ዱቤ ጃራ በበኩላቸው፣ “ወርቃማው ሰኞ” ልምድና ተሞክሮን ከአንዱ ትውልድ ወደ ሌላው ለማስተላለፍ ጠቃሚ መድረክ መሆኑን ገልጸው፣ መርሃ ግብሩ በምርምርና ጥናት የተደገፈ እና በይዘቱም ሆነ በአቀራረቡ የበለጠ እየዳበረ እንደሚሄድ ተናግረዋል።
የሆስፒታሉ ዋና ፕሮቮስት ዶ/ር አበበ ታደሰም የ“ወርቃማው ሰኞ” መርሃ ግብር በተለያዩ የሥራ ዘርፎች ረጅም ዓመታትን በማገልገል ልምድና ተሞክሮ ያካበቱ ሰዎችን በአንድ መድረክ የሚያሰባስብ መሆኑን ጠቁመው፣ ተቋሙ እንዲህ ያሉ መድረኮችን በማጠናከር የሥራ ልምድና እውቀት ልውውጥን ማበረታታት እንደሚገባ ገልጸዋል።
በመጨረሻም ለወ/ሮ ሮማን ጎበና ላበረከቱት ረጅም ዓመታት አገልግሎት፣ ለሥራ ታማኝነታቸውና ለተቋሙ ባበረከቱት አስተዋጽኦ የአንድ ደቂቃ የክብርና የአድናቆት ጭብጨባ ተደርጎላቸዋል።
“ወርቃማው ሰኞ” የልምድና የተሞክሮ ማስተላለፊያ መድረክ ከመሆን ባለፈ፣ በተቋሙ ውስጥ የሥራ ታሪክን የማስታወስ፣ የተሞክሮ ትምህርትን ወደ ቀጣዩ ትውልድ የማስተላለፍና የተሻለ የሥራ ባህል የመገንባት ዓላማን ያለው መርሃ ግብር ነው።
📍 የካቲት 12 ሆስፒታል ሜዲካል ኮሌጅ ኮሚኒኬሽን
📅 ነሐሴ 18/2018 ዓ.ም
📍
📌 Follow Us on Social Media
👉 Facebook:
https://www.facebook.com/profile.php?id=100063650457050
👉 Telegram: Join Our Channel https://t.me/Y12HMCC
👉 Follow us on tiktok
https://vm.tiktok.com/ZMHWJyPGKQmQp-dftjE
🔖 #Y12HMC 💛✨
