ضَـيِ.

قريت هسة فصل كان يسولف عن الاب المثالي أكثر من اللازم و سماه بحضرة المحترم و كال يمكن انت تعتقد الاطفال الي ينشأون من اب مثالي كامل لا يخطئ راح يكونون افضل نفسيا لكن الحقيقة انهم راح ينشأون بعقد نفسية اعمق و اسوء حتى لأن هالاب المثالي هذا راح يوصللهم فكرة انكم لازم تكونون مثاليين و ماكو مجال لاي خطا او هفوة و هذا يخلي الاطفال يجلدون نفسهم بشكل قاسي تحت اي خطا مهما كان بسيط و يحاولون دائما يسعون للمثالية الي هي اصلا ما موجودة و يكلك هذا حضرة المحترم دائما راح يكلك روح هنا و سوي هيج و هذا صح و هذا خطأ! و ممنوع تخالفة أو تمانعه! و هالشي يسبب تشوهات بحيث الإنسان يكوم يشوف العالم لو ابيض و اسود لو خير و شر ماكو مجال للإنسان الطبيعي الي يخطأ و يصيب و يتعلم و يرجع يخطأ

قرات اليوم ٢٠ ص مو هواي صح بس جان بيها معلومات عظيمة
سولف الكاتب بالبداية عن الإنسان الي يسعى للمثالية المفرطة و شكد هي تعيقنا عن تحقيق هواي من الأهداف و الانجازات و تخلينا دائما بتوتر و خوف و بعدها سولف بالتفصيل شنو الأسباب الي تخلي الإنسان يوصل لهاي المثالية و رجع و دخل بعمق الإنسان و سولف انو الإنسان اكو عندة ذاتين الذات الاولى هي الذات الحقيقية الخام تتذكرون البذرة الي كلنا بيها إمكانات كاملة رهيبة هي هاي و الذات الزائفة الي تشكل مثل الغطاء على هاي الذات الحقيقية و تمنعها من الظهور و سبب تكون الذات الزائفة حتى نحمي نفسنا مثلا الإنسان الي تعرض لجرح الرفض و عدم التقبل يكون ذات زائفة تسعى إلى إرضاء الآخرين هي مو ذاتة الحقيقة لكن حتى ينجو من الانتقاد و الألم!
و بعدين سولف الكاتب أنو هاي الذات الزائفة الي هي ذاتنا الحالية شنو نهايتها ؟ نهايتها الذات الزائفة المفروضة يعني انت تكونت عندك ذات زائفة بسبب عدة تجارب و مواقف و هاي الذات الزائفة يبدأون الناس يفرضون عليك اشياء يعني انت لازم تصير طبيب انت لازم تكون كذا و كذا و هذا كلة زائف و مو حقيقتك لكن الفرق وين الفرق بالمرة الاولى انت انشأت هذي الذات الزائفة حتى تحمي نفسك و بالمرة الثانية المجتمع و الناس هي الي فرضت عليك فرضيات تجمعت و صارت ذات لازم انت توصلها حتى ترضيهم و مستحيل توصلها و مستحيل ترضيهم! و بعدين كلك اسال نفسك سؤال منو هذولة الناس الي كونوا الذات الزائفة؟ و فرضوا عليك اشياء انك لازم تسويها ابحث داخل نفسك يمكن يكون اب ام صديق معلم و حطمة! و لتخلي يتحكم بيك! و بذاتك و لتخلي يمنعك عن الوصول لذاتك الحقيقية!
جرح الاستياء و الغضب
اخخخخ لمسني بشكل!
كام يسولف انو الاطفال المكبوتون الي ينضربون و ميكدرون ينفذون عن غضبهم الي يُساء إليهم و يضطرون يسكتون خوفاً من المسيء المتحكم الي غالبا همة الأهل يصير عندهم نوع من كبت الغضب و يكول انو هالاطفال هاي تحاول تنفي الغضب و تمحيه لكن الغضب من أعقد و اصعب المشاعر بالتهدئة مو نوب انت تريد متعترف بي اصلا ف يكبر الشخص هذا و يبدأ يكره كلشي يغضب على كلشي حتى على الاقدار و الدنيا و يبدأ يفرغ غضب طفله الداخلي على الاصدقاء أو الإخوة الأصغر سناً و سولف سالفة حلوة الي هي كيس الرمل يعني هذا الشخص من كان طفل كان الأب يستخدمة ك كيس رمل يفرغ بي غضب الطفل الداخلي مالتة مثل ميكول الكاتب الآباء الغاضبون ليسوا سوى اطفال غاضبون يتنمرون على الأصغر منهم سنا!!
و المصيبة هذا الطفل الي تعرض لهذا الاب ممكن يتحول مثل أبوه و هم يبدأ يفرغ غضب طفله بالناس ف شنو الحل الحل ارجع لهذا الطفل اهدئء و اربت عليه و اشوف شنو الشي الي جارحة؟ بدل ما اني اتجاهلة و بالتالي راح يهيج و يثور أكثر
و هم سولف شلون ممكن الاب المعاقب يشوه صورة الله عند الطفل ف يبدأ الطفل يخلط بين الأبوة و الاب و بين الله ف يعتقد بأن الله مثل الاب يعاقب و يجلد و يسيء حاشاة لله و و بعد ما يكبر يكوم ميعرف يفرق هل هو غاضب من الدين ام من المتدينين المتعصبين أو المزيفين لأن مستحيل متدين حقيقي يضيع عليك درب الله

قرات اول 40 صفحة من كتاب ابي الذي اكره