إسمحولي بقي اتكلم من وجهة نظري ووجهة نظر علمية ايه هي أسباب الطلاق ؟
١ـ سوء التربية : يعني ايه ؟
يعني يا سيدي مثلاً واحد اتعود من اهله أنه مبيتحملش مسؤوليه اي حاجة ، هتلاقيه بيهرب من المشاكل ومش عارفه يحلها وده بيكون عامل كبير في الطلاق عدم قدره الشخص علي تحمل مسؤولية حاجة في حياته.
٢ـ غياب العقلانية
وهنا معني الكلام انك محكمتش عقلك بنص جنيه وفضلت عايش حياتك ورود وقلوب حمرا واحلام وهمية طول فترة الخطوبه وبعدين هوب تلاقي نفسك لبست في حيطة ، ايه الواقع المظلم ده يلا نتطلق.
٣ـ العبء المالي ودي مش محتاجة شرح.
٤ـ العادات الخاطئة
اللي هو نا راجل بحب أخرج مع صحابي وأسهر بره بس مش بتاع شغل وباخد مصروفي من بابا وبتكون الست هنا متحمله المسؤولية دي فبيكون النتيجه أنها تعبت ومحتاجة ترتاح والحل الطلاق
٥ـ إهتمام الطفل
جايز ده سبب عبيط شوية ولكن مؤثر ، يعني مثلا الست مع أول طفل ليها بتبدأ تهتم اوي بطفلها زياده عن اللزوم وتنسي أن زوجها ليه حقوق عليها ، فيبدأ الزوج يدور بره علي الاهتمام المفقود ده.
٦ـ إهمال الزوجة
إن الراجل يهمل مراته لأسباب عدة منها مثلا أنه إنسان عملي جدا ومعندوش وقت يديها حقها الواجب عليه أو يهتم بيها ، وده بيخليها تبدأ تشك في مشاعره ومن هنا تبدأ الخلافات
٧ـ حب السيطرة
إن الإنسان يكون مسيطر ومتطفل علي مراته في كل حاجه وحاببها تكون خاضعة وضعيفه ولكن علي النقيد الآخر هي ست عندها كرامه ومش هتسمح بده لمده كبيره حتي لو بتموت فيه فبيكون الطلاق هو الحل.
٨ـ إدمان السوشيال ميديا
إن أي طرف من الزوجين منشغل طول الوقت بالموبايل ومواقع التواصل الاجتماعي ومش مهتم بأي حاجه غير العالم الافتراضي ويبدأ يكون علاقات وصداقات وده بيأثر علي الأسرة وحياتها
وكمان إنه بينشر أخباره كلها واخبار بيته وحياته علي السوشيال ميديا
٩ـ تدخل الأهل بطريقة غلط بين الزوجين.
١٠ـ عدم التوافق بين الزوجين
في الاهتمام والميول والأشياء المحببة لان واحد فيهم كان ليه طبيعه حياتيه وسلوك غير التاني
وكمان عدم التوافق الجنسي أو عدم الإنجاب
١١ـ نسيان الأصول
وده سبب مهم أوي ، إن كل واحد فينا نسي هو ليه ايه وعليه ايه وبيكون ده اكبر سبب للطلاق
١٢ـ الحب الطارئ
وهو دخول أحد الزوجين في علاقة حب من طرف آخر وأغلبها بيكون بسبب السوشيال ميديا
١٣ـ الحالة الطارئة
اللي هو مثلا واحده اتجوزت قاصر فلما كبرت لقت الدنيا فيها حاجه غلط مش عارفه تتوافق ، مش حاسه ان ده الزوج المناسب
او مثلا اصابه الزوج أو الزوجة بمرض مزمن أو إفلاس الزوج ودي أقل نسب الطلاق
#إسراء_سعد
3
1September 2, 2024 751 1 1
