- أنا زهجانه ونسني .😒
- شنو رأيك في السودان.🙂
- حل لي كل مشاكل حياتي.😳
- أكتب لي مشروع تخرج في دقيقتين.
- أحكي لي قصة عن نملة بتحب القهوة.☕️
قبل ندخل في الموضوع ..!
خلي النملة تعمل ليك كباية قهوة زابطة كده و جيبها و تعال ركز معاي.
(جيب القهوة ما النملة..😉 أو ممكن تجيبيها تونسك..😏)
بسم الله نبدا و رركز معاي كتير عشان تطلع باكبر فايدة ممكن.
اكيد سمعت قبل كدة بالذكاء الإصطناعي او بـ Chat GPT و غيرو من "تطبيقات الذكاء الأصطناعي".
و أكيد حتكون إستخدمتها من باب الفضول او عشان تونسك و تحكي ليك نكات كل دقيقتين .
و يوم الزنقة ممكن تنفعك في مشروع تخرج في دقيقتين..
و لو الدنيا ضاقت بيك ممكن تساعدك تغير حياتك في يومين..
بعد جربت الحاجات دي اكيد حذفتهم او خاليهم من باب البرستيج و انا زول مطور و متابع و كده..
للأسف دى اغلب الإستخدامات والتجارب الشخصية لكتير من الناس "يعني ما براك ما تخاف" ..
وده مبرر لأسباب كتيره حنناقشها في المقالة دي و في مقالات تانية كتيرة جاية في السكة إن شاء الله عشان تقدر تستفيد من اغلب نماذج الذكاء الإصطناعي المتوفرة حالياً..
و عشان لم تكون عايز تسمع "قصة النملة البتحب القهوة" تعرف تختار اي نموذج من النماذج المتوفرة و كيف تخلي يحكى ليك قصة ممتعة فعلاً و تعملها سلسلة قصص او كتاب او رواية و انت و زوقك تانى ..
و حتى ناس المشاريع في نماذج حتفيد اكتر من غيرها و تديك نتائج افضل و علمية و موثوقة.
- أول مشكلة و حنركز عليها في المقاله دي (فهمك للذكاء الإطناعي و النماذج المنتشره حالياً)
الذكاء الإطناعي ما تقنية عابرة او تطبيق دردشة حتستخدمو للدردشة و الونسه مع ربوت وقت فراغك. و وقت الحوجة تسالو سؤال "عابر" قد يكون عندو إجابة تختصر ليك الزمن وقد ما تصل للإجابة الكنت عايزها و برضو ده لاسباب كتيرة اولها طريقة سؤالك عن حاجة معينة.
في المستقبل القريب التنافس في سوق العمل يميل لصالح من يفهم أليات عمل هذه النماذج و كيف يحصل على المعلومات و يجعلها مساعد شخصي له تنجز له الكثير من الأعمال .
و قطعا لن تميل الكفة لصالح من يستخدمها للتسلية .
- مصطلح الذكاء الإصطناعى:
أغلب الناس بتستخدم مصطلح الذكاء الإصطناعي لوصف النماذج التوليدية و هو مصطلح غير دقيق , الذكاء الاصطناعى مفهو اشمل و اكبر من النماذج التوليدية.
ناخد مثال بسيط و عام لتوضيح الفكرة :
لم تطلب بيتزا اكيد حتطلبها من مطلعم ... مصطلح ذكاء اصطناعي هنا بمثل المطعم و بعدها بتكون في اقسام كالتالي :
- المطبخ و ده مكان تجهيز الوصفات و ده بمثل لينا هنا (تعليم الآلة Machine Learning).
- الفرن المتقدم عالى الحرارة البصنع البيتزا و ده هنا بمثل (التعلم العميق Deep Learning).
- الطبق النهائي "البيتزا" و ده بمثل النماذج التوليدية زى ChatGPT , Gemini , DeepSeek..
(ناس البرمجة و تقنية المعلومات لو حابين نفصل في الموضوع بشكل علمى اكتر اكتبوا لي في التعليقات)
فهمك للفروق دى هو اول مفتاح لإزالة الغموض . و لازم تعرف انك ما قعد تتحدث مع عقل بل مع نماذج إحصائية معقده تم تدريبها على كل شئ من الانترنت و غيرها من البيانات , و عشان كده في اغلب الاوقات النتائج بتكون غير صحيحه او ما هي النتائج الانت بتبحث عنها و عشان تعالج النقاط دى برضو في مفاهيم لازم تعرفها و تتدرب عليها و ده حيكون من ضمن المواضيع التالية ان شاء الله.
لمحه عن مواضيع المقال التالي :
- المعاملات او المعلمات (Parameters)
- كيف يتعلم
- مشاكل النسيان (ينسى جزء من الدردشة)
في لختام إذا كنت مهتم بمواضيع الذكاء الإصطناعي و حابي نواصل في السلسلة دى ممكن تشاركنا في التعليقات بالاسئلة الفي بالك و المواضيع الحابي تعرفها و إن شاء الله حتلقى ليها جواب بإذن الله .
و ما تنسى شيريك يفيد غيرك.
طبعاً كلكم عارفين منو البقول للذكاء الإصطناعي " أنا زهجانه ونسني "🤣😏
✍️ م. أحمد محمد عبد الرحيم
#ذكاء_إصطناعي #ChatGPT #النماذج_التوليدية #تعليم_الآلة #التعليم_العميق
