مادري مين منكم يحتاج يسمع هذا الكلام لكن بقوله لعل و عسى يكون مفيد لاحد اختبار التحصيلي قرب مره ايام معدوده تنعد على الاصابع و في كثير فاقد الامل او حاس انه مارح يلحق عليه و يخلصه سواء بسبب ظروف و راكمت ماقدرت تذاكر سواء بسبب مدرسه سواء بسبب قدرات لو حتى لو بدون اي سبب اصلا بس كذا ماخططت زين و والله توك تفك التحصيلي اكتشفت ان وراك جبااال من التسويف و جاك الاحباط يالله كيف بخلص هذا كله مافي امل و تجلس بدل ماتذاكر تتحسر على الوقت اللي ماذاكرت فيه ولا تنجز ولا تقول مافي فايده حتى لو بدأت الحين مستحيل اجيب درجة زينه أنا كنت بمكانك بالضبط شوفو ياجماعه الخير أنا اكلمكم الحين و أنا بالجامعه و توي طلعت من اختبار اصعب ماده بالترم الترم الثاني له كم يمكن ثلاث شهور طبعا من الاول ماذاكرت أخذت اجازه و والله و يجي رمضان و انشغل فيه و اسوف زياده ولا افك أي ماده من المواد والله يجي بعد رمضان العيد و الاحتفال و اممد لنفسي الاجازه اجلس على ذا الحال اقسملكم بالله اسوف تسويف مو صاحي ورب الكعبه لو بجيبي اختبار الماده مابكون بهذي البجاحه لين قبل الاختبار بثلاث ايام و أنا ماعرف اي شي الا اسم الماده و افك الماده لأول مره بسم الله الرحمن الرحيم والله اح راكمت كثير والله كثير مستحيل هذا كله اقدر اخلصه بثلاث ايام يولد كم محاضرات ثلاث شهور بجي اذاكرها بثلاث ايام يالله وش اسوي الحين خلاص تندمت تحسرت أكلت اصابع الندم مو بس عضيتها بكيت على الاطلال سويت كل الدراما بالدنيا و بعدين خلاص مافي حل الا اني اجلس و احاول مره مافي شي ثاني بيفيدني بهذي اللحظه حتى لو ابغى اصيح مافي وقت للصياح و ابدا اذاكر اليوم الاول يمكن بالقوه أخذت محاضرتين اليوم الثاني جلست اهوجس بأعز الناس اللي غدر فيني و أنا ماستاهل و تنكدت و ماذاكرت الا نص محاضرة و يجي اليوم الثالث يرجال والله اح كثير مره بكره الاختبار و يعتبر لو دخلت بذا الشكل برسب خلاص بكيت على الاطلال كثير لازم أقوم الحين مافي وقت لاي شي الحين نحاول انقاذ مايمكن انقاذه طبعا أهم شي في هذي الحالات انك تكون متزن نفسيا ولا تتوتر مهما كان لأن التوتر مايسوي شي الا انه يزيد الطين بله لاتجلس تفكر باقي لي كذا و كذا و بس كم ساعه مستحيل اقدر اخلص ، فضي عقلك مره لاتفكر والله و اسوي لي كوب قهوه و اروق و أقول بسم الله و اذاكر و اذاكر و اذاكر و يمكن تجلس تفكر حتى لو ذاكرت الحين مستحيل اتساوى باللي يذاكر من شهور مستحيل اجيب درجه كويسه مستحيل مدري ايش قسم بالله ان كلها وساوس شيطان ولا لها أي اصل و أصلي ركعتين و أقول يارب بكرمك مو بعملي و أنت كريم و اذاكر ابدا بالمحاضرات السهله عشان اجمع درجات و اجلس احل و احاول احفظ مايمكن حفظه أي شي بالدنيا و اذاكر لين قبل الاختبار بنص ساعه و اقوم اتجهز و اتكشخ و اجلس بالطريق اشوف أسأله التجميعات والله و الذي رفع السماوات بدون عمد اني دخلت و طلعت و مانقصت الا ثلاث درجات هذا و أنا اول مره افك المحاضرات من ثلاث ايام ! شلون والله احلفلكم بالله انه مو بعملي ولا بمذاكرتي لكن بكرم الله الواحد الأحد نصيحتي لكم ياجماعه لاتفقدون الامل ابدا والله ان ربك مايضيع أي عمل حتى لو باقي على اختبارك نص ساعه قم و فك الكتاب ذاكر و شوف و توكل على الله خل ايمانكم بالله عالي والله انه مايتوكل احد على الله و يخيب ظنه و الله يوفقنا جميعا و إياكم المعذرة طولت عليكم لكن لعل و عسى تكون رساله تحفز فيها و لو شخص واحد و عندكم مصادر مجانية في المثبت و اقولكم انه مهما صار لاتفقد الامل و السلام عليكم و رحمه الله و بركاته
381
13
2
1
