ሥርዓተ ማኅሌት አመ ፲ወ፮ ለነሐሴ ኪዳነ ምሕረት
ሥርዓተ ነግሥ፦
ስምዓኒ እግዚኦ ጸሎትየ፤ሃሌ ሉያ ሃሌ ሉያ፤ወይብጻሕ ቅድሜከ ገአርየ፤ሃሌ ሉያ ሃሌ ሉያ፤ወኢትሚጥ ገጸከ እምኔየ፤በዕለተ ምንዳቤየ አጽምእ እዝነከ ኀቤየ፤ሃሌ ሉያ ሃሌ ሉያ፤አመ ዕለተ እጼውአከ ፍጡነ ስምዓኒ፤ሃሌ ሉያ ሃሌ ሉያ፤ለዓለም ወለዓለመ ዓለም፤ሃሌ ሉያ ዘውእቱ ብሂል፤ንወድሶ ለዘሃሎ እግዚአብሔር ልዑል፤ስቡሕ ወውዱስ ዘሣረረ ኲሎ ዓለመ፤በአሐቲ ቃል።
መልክአ ሥላሴ፦
ሰላም ለኲልያቲክሙ እለ ዕሩያን በአካል፤ዓለመክሙ ሥላሴ አመ ሐወጸ ለሣሕል፤እምኔክሙ አሐዱ እግዚአብሔር ቃል፤ተፈጸመ ተስፋ አበው በማርያም ድንግል፤ወበቀራንዮ ተተክለ መድኃኒት መስቀል።
ዚቅ፦
ወታስተሥርዩ ኃጥያተ ህዝብኪ ተበውሐ ለኪ፤እም አብ ወወልድ ወመንፈስ ቅዱስ፤ከመ ትኲኒ ተንከተመ ለውሉደ ሰብእ፤ለሕይወት ዘለዓለም፤ለኪ ይደሉ ከመ ትኵኒ መድኀኒቶሙ ለመሐይምናን ሕዝብኪ፤ኦ መድኃኒተ ኲሉ ዓለም ወልድኪ ሣህሎ ይክፍለነ ሰዓሊ ለነ ቅድስት።
ነግሥ፦
እምጌቴሴማኒ ፈለሰት ኀበ ዘሉዓሌ መካን፤ውስተ ቤተ መቅደስ ረባቢ ዘመሳክዊሁ ብርሃን፤አንቀጸ አድኅኖ ማርያም ጽላተ ኪዳን፤ኵሉ ይብልዋ በአኅብሮ ዘበዕብራይስጢ ልሳን፤ዕፀ ጳጦስ ይዕቲ እንተ በአማን ቅድስተ ቅዱሳን፤እመቅድሐ ከርሣ ተቀድሐ አስራባተ ወይን፤ወበውስቴታ ተሠርዓ ቁርባን።
ዚቅ፦
ዕፀ ጳጦስ እንተ በአማን መዝገቡ ለቃል፤ዕፀ ጳጦስ እንተ በአማን አንቀጸ ብርሃን፤ዕፀ ጳጦስ እንተ በአማን ጽጌ ደንጉላት፤ሐረገ ወይን ዘእምነገደ ይሁዳ፤እንተ ሠረፀት ለመድኃኒት።
መልክዓ ኪዳነ ምህረት፦
ሰላም ለፍልሰተ ሥጋኪ ኀበ ሕንጻ ሕይወት ዘተሐደሰ፤እምቅድመ ዝኒ ኀቤሁ ሥጋ ወልድኪ ፈለሰ፤ቤዛዊተ ዓለም ማርያም አስተበቁዓኪ አንሰ፤ትቤዝዊ በኪዳንኪ ዘዚዓየ ነፍሰ፤እስመ በሥራያ ይእቲ ቀብዓተኒ ፈውሰ።
ዚቅ፦
ደብተራ ፍጽምት ዘጳዉሊ፤ወማኅደሩ በጽድቅ ዘገብራ ከሃሊ፤ፈለሰት እምዘይበሊ ኃበ ኢይበሊ፤በመሰንቆሁ እንዘ የኃሊ፤ዳዊት አቡሃ ዘወልዳ ወዓሊ።
ወረብ፦
ደብተራ ፍጽምት ዘጳዉሊ ፈለሰት እምዘይበሊ ኃበ ኢይበሊ/፪/
በመሰንቆሁ እንዘ የኃሊ ዳዊት አቡሃ ዘወልዳ ወዓሊ/፪/
መልክአ ማርያም፦
ሰላም ሰላም ለዝክረ ስምኪ ሐዋዝ፤እምነ ከልበኔ ወቊስጥ ወእምነ ሰንበልት ምዑዝ፤ማርያም ድንግል ለባሲተ ዓቢይ ትዕዛዝ፤ይስቅየኒ ለለጽባሑ ወይነ ፍቅርኪ አዚዝ፤ከመ ይሰቅዮ ውኂዝ ለሠናይ አርዝ።
ዚቅ፦
ሰላም ለኪ ማርያም እመ አምላክ፤ወልድኪ ይጼዉዓኪ፤ውስተ ሕይወት ወመንግሥተ ክብር።
ወረብ፦
ሰላም ለኪ ማርያም እመ አምላክ ማኅደረ መለኮት/፪/
"ወልድኪ"/፪/ይጼዉዓኪ ውስተ ሕይወት ወመንግሥተ ክብር/፪/
መልክዓ ማርያም፦
ሰላም ለእስትፋስኪ ዘመዓዛሁ ሕይወት፤ከመ መዓዛ ዕፀ ኅሩይ ዘውስተ ገነት፤ማርያም ድንግል ቤተ ቅድሳት፤ጽንሕኒ ውስተ ሠናይ ወሰውርኒ እሞት፤በአክናፍኪ ርግብየ ኅሪት።
ዚቅ፦
ንዒ ኀቤየ እንቲአየ ሠናይት ርግብየ፤መዓዛ አፉሃ ከመ ኮል፤ወኵሉ ነገራ በሰላም።
ወረብ፦
ንዒ ኀቤየ እንቲአየ ሠናይት ርግብየ/፪/
መዓዛ አፉሃ ከመ ኮል/፬/
መልክዓ ፍልሰታ፦
ሰላም ለፍልሰተ ሥጋኪ ዘኢይቀብል ሞገሱ፤ወዘኢይነጸፍ ባሕርየ ተውዳሱ፤ማርያም ታዕካ ለእግዚአብሔር ጽርሐ መቅደሱ፤ተበሃሉ በሰማያት እለ ኪያኪ አፍለሱ፤ማርያምሰ በምድር ታንሶሱ።
ዚቅ፦
ማርያም ጽርሕ ንጽሕት፤ማሕደረ መለኮት፤እኅቶሙ ለመላእክት ሰመያ፤ሰማያዊት እንተ በምድር ታንሶሱ።
አመላለስ፦
ማርያም ጽርሕ ንጽሕት/፪/
ጽርሕ ንጽሕት ማሕደረ መለኮት/፪/
አንገርጋሪ፦
ትርሢተ ወልድ መለኮት ወፍቅር፤ኀደረ ላዕሌሃ፤ይቤላ ርግብየ ወይቤላ ሠናይትየ፤ፀቃውዕ ይውኅዝ እምከናፍሪሃ።
ምልጣን፦
ይቤላ ርግብየ ወይቤላ ሠናይትየ፤ፀቃውዕ ይውኅዝ እምከናፍሪሃ።
አመላለስ፦
ፀቃውዕ ይውኅዝ/፪/
ይውኅዝ እምከናፍሪሃ/፬/
ወረብ፦
ትርሢተ ወልድ መለኮት ወፍቅር ኀደረ ላዕሌሃ/፪/
ይቤላ ርግብየ ወይቤላ ሠናይትየ/፪/
እስመ ለዓለም፦
በአልባሰ ወርቅ ዑጽፍት ወኁብርት፤እኅትየ መርዓት አዳም አጥባትኪ እምወይን፤መዓዛ ዕፍረትኪ እምኵሉ አፈው፤እትፌሳሕ ወእትሐሠይ ብኪ፤ናፍቅር አጥባተኪ እምወይን፤ርቱዕ አፍቅሮትኪ ኵለንታኪ ሠናይት እንተ እምኃቤየ፤አልብኪ ነውር ወኢምንትኒ በላዕሌኪ፤ፃዒ እምሊባኖስ እኅትየ መርዓት።
አመላለስ፦
አልብኪ ነውር ወኢምንትኒ በላዕሌኪ/፪/
ፃኢ እምሊባኖስ እኅትየ መርዓት/፬/
ወረብ፦
"በአልባሰ ወርቅ"/፪/ዑጽፍት ወኁብርት/፪/
እኅትየ መርዓት አዳም አጥባትኪ/፪/
ሰላም፦
ንዒ ኀቤየ እንቲአየ ሠናይት ርግብየ፤መዓዛ አፉሃ ከመ ኮል፤ወኵሉ ነገራ በሰላም።
1August 21, 2026 177
