السلام عليكم ورحمة الله وبركاته طبعاً عام دراسي جديد عليكم طلاب المرحلة الأولى، ناسي أحچي وياكم من قبل بس لأن عدنه ضغط ولود باقي المراحل، بس حبيت أذكركم وأأكد لكم إن مرحلة أولى لازم تركزون تركيز كامل على تشريح الإنسان وتشريح الأسنان لأن هذني الأساس وراح يبقن وياكم من هسه لحد التخرج وتحتاجوهن بكل المراحل الجاية. رسم كل سن واجب أساسي على كل طالب مرحلة أولى، وحفظ مناطق السن وتفاصيله واجب منكم، لأن بعدها تبدي مرحلة النحت واللي هي أول مختبر عملي إلكم، وهذا النحت مو مجرد مادة تعدّيها لا، هذا الأساس الحقيقي اللي من خلاله راح تضبط شغلك بالحشوات بالمستقبل. يمكن شايفين الحشوات بالعيادات الخاصة شكلها يخبل وكأنها سن طبيعي، ويمكن تسألون منين إجه هذا الشكل، إجه من الرسم والنحت والفهم الصحيح لتشريح السن، لأن من تكون حافظ السن شلون شكله الطبيعي وحدباته وأخاديده وشلون يرجع للـanatomy مالته، وقتها من تبني الحشوة راح تعرف شلون ترجع السن لوضعه الأصلي وكأنه ما كان بي شي. اعتبروا الرسم والنحت مو واجب دراسي بس، اعتبروه استثمار بمستقبلكم كأطباء أسنان، وأي شي تحتاجوه أو أي سؤال يخطر ببالكم راسلوني بدون تردد، وإن شاء الله أكون وياكم خطوة بخطوة، وبالتوفيق للجميع يارب.
3
1January 13, 2026 578 1
