ဆန်ဈေးကြီးနေ၍ ပွဲစားများနှင့် ရောင်းဝယ်ခြင်း ဆန်အသင်းတားမြစ် ဧရာဝတီ၊… — The Irrawaddy - Burmese

The Irrawaddy - Burmese@theirrawaddy · 76.1K subscribers Open in TelegramOpen

ဆန်ဈေးကြီးနေ၍ ပွဲစားများနှင့် ရောင်းဝယ်ခြင်း ဆန်အသင်းတားမြစ်

ဧရာဝတီ၊ အောက်တိုဘာ ၇၊ ၂၀၂၆

ပြည်တွင်းဆန်ဈေး တည်ငြိမ်ရေးဆိုကာ ပွဲစားများနှင့် အဆင့်ဆင့်ရောင်းဝယ်ခြင်းများ၊ ဆန်ဈေးတက်ဖို့ ရည်ရွယ်သည့် ပုံမှန်မဟုတ်သည့် အရောင်းအဝယ်များ မလုပ်ဖို့ မြန်မာနိုင်ငံဆန်စပါးကုန်သည်များအသင်းက ထုတ်ပြန်လိုက်သည်။

အောက်တိုဘာ ၃ ရက်က အာဏာသိမ်းအစိုးရ သက်ဆိုင်ရာနှင့် မြန်မာနိုင်ငံဆန်စပါးကုန်သည်များအသင်းမှ တာဝန်ရှိသူများက ဝါးတန်းလမ်း ဆန်ကုန်စည်ဒိုင်၌ ကုန်သည်များနှင့် ပွဲစားများကို ခေါ်ယူတွေ့ဆုံပြီး ဆန်ဈေးနှုန်းများကို ထိန်းထိန်းသိမ်းသိမ်းရောင်းဝယ်ကြရန် ပြောဆိုခဲ့ပြီးနောက် ယင်းထုတ်ပြန်ချက် ထွက်ပေါ်လာခြင်းဖြစ်ကြောင်း ကုန်သည်များထံမှ သိရသည်။

ဆန်ကုန်သည်တဦးက “ဆန်ဆိုတာ အသစ်ထွက်ရင် အဟောင်းတက်တာကတော့ သဘာဝပါပဲ။ ဒါပေမယ့် သူတို့ စာထွက်ပြီးမှ ဈေးက ပိုတက်သွားတယ်ဆိုတဲ့ သဘောဖြစ်နေတယ်။ အခု အချောရော၊ အကြမ်းရော တက်တယ်။ အဟောင်းကတော့ ဝယ်တဲ့သူတွေလည်း ဈေးမလိုက်နိုင်တော့ဘူး။ ပေါ်ဆန်း အသစ်ကတော့ မထွက်သေးဘူး။ အကြမ်းတအိတ် ကျပ် ၄,၀၀၀ ကနေ ၅,၀၀၀ လောက်တက်တယ်” ဟု ဧရာဝတီကို ပြောသည်။

လက်ရှိ ဆန်ကြမ်း လက်ကားဈေးမှာ ယခင်က တအိတ် ကျပ် ၇ သောင်း ၅ ထောင်ကျော်မှ ယခု တအိတ် ကျပ် ၈ သောင်း ကျော်မှ ကျပ် ၁ သိန်း ၂ သောင်း ကျော်အထိ တက်လာပြီး၊ ပေါ်ဆန်းဆန်မှာလည်း ပြီးခဲ့သည့်တပတ်က ကျပ် ၁ သိန်း ၈ ထောင် ၅ ရာ ခန့်ရှိရာမှ ယခု ၂ သိန်းကျော်အထိ တက်လာကာ အရည်အသွေးကောင်းသည့် ဆန်များမှာ ကျပ် ၂ သိန်း ၈သောင်းကျော်အထိရှိကြောင်း သိရသည်။

ဆန်ဈေးတက်နေခြင်းက ပွဲစားအဆင့်ဆင့် ရောင်းဝယ်မှုကြောင့် မဟုတ်ဘဲ စက်သုံးဆီဈေးနှုန်း၊ အလုပ်သမားခနှင့် ဓာတ်မြေဩဇာအပါအဝင် စိုက်ပျိုးထုတ်လုပ်မှုစရိတ်များ မြင့်တက်ခြင်း၊ အလုပ်သမားစရိတ် ကြီးမြင့်ရှားပါးခြင်း အပါအဝင် ဆန်အဟောင်းလည်း ရှားပါးလာခြင်းတို့ကြောင့်ဖြစ်ကြောင်း ဆန်ကုန်သည်များက ဆိုသည်။

ယခုလို ပွဲစားအဆင့်ဆင့် ရောင်းဝယ်မှုကို ကန့်သတ်ထားခြင်းနှင့် ပတ်သက်၍ “ပွဲစားဆိုတာ ကျနော်တို့ မမွေးခင်ကတည်းက ရှိခဲ့တာပါ။ အရင်းအနှီး မရှိလို့ ပွဲစားလုပ်တာပါ။ အရင်းအနှီးရှိရင် ကုန်သည်ပဲလုပ်မှာပေါ့” ဟု ဆန်ကုန်သည်၊ ပွဲစားတဦးက ပြောသည်။

ယင်းကိစ္စနှင့်ပတ်သက်၍ မြန်မာနိုင်ငံဆန်စပါးကုန်သည်များအသင်းထံ ဆက်သွယ်မေးမြန်းသော်လည်း ပြန်လည်ဖြေကြား ခြင်း မရှိသေးပေ။

ရန်ကုန်မြို့ရှိ ကုန်သည်နောက်တဦးက “အရင်က တရက်ကို အလုပ်သမားခ ကျပ် ၂ သောင်းလောက်ပဲ ပေးရတယ်။ အခု ကျပ် ၃သောင်း၊ ၄ သောင်း ပေးခေါ်တာတောင် လုပ်မယ့်အလုပ်သမား မရှိဘူး။ နောက်ပြီး တခြားကုန်ကျစရိတ်တွေလည်း တက်နေတာကို ဆန်ဈေးတခုတည်း လျှော့ချမယ်ဆိုတာ မဖြစ်နိုင်ဘူး။ ကုန်ကြမ်းဈေးတွေ ကျမှ ဆန်ဈေးလည်း ကျမှာပေါ့” ဟု ဆိုသည်။

အထက်ပါ ထုတ်ပြန်ချက်အပေါ် တောင်သူများနှင့် ဆန်ဈေးကွက်အတွင်း လုပ်ကိုင်သူအချို့ကလည်း ဝေဖန်မှုများရှိနေပြီး ဆန်ဈေးနှုန်း တည်ငြိမ်ရေးကိုသာ အလေးထား ဆောင်ရွက်ခြင်းထက် တောင်သူများ၏ ထုတ်လုပ်မှု ကုန်ကျစရိတ်၊ တွက်ခြေကိုက် အကျိုးဖြစ်ထွန်းရေးနှင့် သင့်တင့်သည့် ထွက်ကုန်ဈေးနှုန်းရရှိရေးကိုပါ ထည့်သွင်းစဉ်းစားရန် လိုအပ် ကြောင်း ထောက်ပြ ပြောဆိုသည်။

ထို့ပြင် အာဏာသိမ်းအစိုးရ၏ လက်အောက်ခံ မြန်မာနိုင်ငံ ဆန်စပါးကုန်သည်များအသင်းက သတ်မှတ်ဈေးနှုန်းဖြင့် ရောင်းချရန် သတ်မှတ်ထားသော်လည်း လက်တွေ့တွင် မည်ကဲ့သို့ ရောင်းချရသည်ကို ၎င်းတို့ ကိုယ်တိုင်ပင် အသိဆုံးဖြစ်ပြီး ကုန်စည်ဒိုင်ဈေး ကျမှသာ ဈေးကွက်လည်း ကျနိုင်မည်ဖြစ်ကြောင်းလည်း ကုန်သည်၊ ပွဲစားများက ဆိုကြသည်။

“အပြင်မှာ ပေါက်ဈေးက ရှိပြီးသား။ နေရာကွာတာနဲ့ ဈေးက ကွာသွားတယ်။ သူတို့ထုတ်ပြန်တာတွေက မြေပြင်နဲ့က ဆန့်ကျင်ဘက်ပဲ” ဟု ဆန်ကုန်သည်က ဆိုသည်။

စက်သုံးဆီ ဈေးမြင့်တက်မှုကြောင့် ပြီးခဲ့သည့်ရက်ပိုင်းက ရန်ကုန်မြို့တွင်း မြို့နယ်များမှ မြို့စွန်မြို့နယ်များသို့ သယ်ယူ ပို့ဆောင်စရိတ်မှာ ယခင်က တအိတ် ကျပ် ၁,၀၀၀ မှ ယခု ၁,၅၀၀ ကျပ်အထိ တက်လာပြီး ရန်ကုန်မှ မန္တလေးသို့ တအိတ် တင်ပို့လျှင် ကျပ် ၅,၀၀၀ ခန့်သာရှိရာမှ ယခု ကျပ် ၆,၀၀၀၊ ၇,၀၀၀၊ ရန်ကုန်မှ မြိတ် သို့ တင်ပို့လျှင် တအိတ် ယခင် ကျပ် ၆,၀၀၀ မှ ယခု ကျပ် ၈,၀၀၀ အထိ မြင့်တက်လာကြောင်း အွန်လိုင်း ဆန်ရောင်းဝယ်ရေး လုပ်ငန်းရှင်များထံက သိရသည်။

ယခုဆန်ဈေးနှုန်းမြင့်တက်မှုတွင် ပွဲစားအဆင့်ဆင့် ရောင်းဝယ်မှုအပြင် စိုက်ပျိုး ထုတ်လုပ်မှုကုန်ကျစရိတ်၊ လုပ်သား ရှားပါးမှု၊ စက်သုံးဆီနှင့် သယ်ယူပို့ဆောင်ရေးစရိတ်များ မြင့်တက်လာခြင်းတို့လည်း ပါဝင်နေသဖြင့် ဆန်ဈေး တည်ငြိမ် ရေးအတွက် အရောင်းအဝယ်အဆင့်ဆင့်ကို ထိန်းချုပ်ခြင်း တခုတည်းဖြင့် ဖြေရှင်းနိုင်မည်မဟုတ်ကြောင်း ဈေးကွက် အတွင်း သုံးသပ်မှုများ ရှိနေသည်။

Website တွင် ဖတ်ရန် https://burma.irrawaddy.com/news/2026/10/07/416860.html