صباح الخير يا شباب
لو خسرت النهارده شغلانة، أو ضاعت منك تحويشة العمر، أو مشروعك الخاص منجحش؛ هتحس إنك "مفلس" والدنيا اسودت في وشك!
لكن تعالوا نشوف النبي ﷺ كان بيقيس الإفلاس والخسارة إزاي..
في يوم النبي ﷺ سأل الصحابة: «أتدرون ما المُفلس؟» قالوا: المُفلس فينا من لا درهم له ولا متاع.
فقال ﷺ: «إن المُفلس من أمتي يأتي يوم القيامة بصلاة، وصيام، وزكاة، ويأتي قد شتم هذا، وقذف هذا، وأكل مال هذا، وسَفك دم هذا، وضرب هذا، فيُعطى هذا من حسناته، وهذا من حسناته، فإن فَنيَت حسناته قبل أن يُقضى ما عليه أُخِذَ من خَطاياهم فطُرِحَت عليه، ثم طُرِحَ في النار.»
الحديث ده بيفوّقنا!
الخسارة مش خسارة فلوس ولا مركز، الخسارة الحقيقية إنك تتعب في عبادات كتير، وتيجي يوم القيامة تلاقي ثوابها بيتاخد منك بسبب شتيمة قلتها لجارك، أو بوست اتريقت فيه على حد، أو غيبة واستهزاء بزميلك، أو غيره من الذنوب المتعلقة بحقوق العباد..
فحافظ على "رصيد حسناتك" النهارده من الاستنزاف!
