صباح الخير يا شباب
عمرك رحت لدكتور، وكتبلك روشتة علاج، وبعدين رجعت حطيتها في الدرج، وكل يوم تبص عليها من غير ما تاخد الدوا؟!
غالبًا لأ..
طب ليه بنعمل كده أحيانًا مع القرآن؟
ربنا سبحانه وتعالى قال: ﴿يَا أَيُّهَا النَّاسُ قَدْ جَاءَتْكُمْ مَوْعِظَةٌ مِنْ رَبِّكُمْ وَشِفَاءٌ لِمَا فِي الصُّدُورِ...﴾
القرآن شفاء لما في صدورنا..
لكن الشفاء مش بمجرد إن المصحف موجود في بيتنا، ولا بمجرد إننا نقرأه بسرعة عشان نخلص الوِرد!
الشفاء يبدأ لما الآية تدخل قلبك..
لما تلاقي آية تهوّن عليك حزنك، وآية تهدي خوفك، وآية تفوّقك من غفلتك، وآية تعالج حاجة جواك محدش أصلًا عارف عنها حاجة..
فلو قلبك تعبان ومستنزف؛ افتح مصحفك، واقرأ بتدبر..
يمكن الدواء اللي بتدور عليه موجود قدامك في آية.
