📌 إجابة على أكثر الأسئلة المتكررة بخصوص جلسات حلف اليمين
في الفترة الأخيرة وصلتني أسئلة كتير جدًا على الخاص، غير الأسئلة الموجودة في التعليقات، وبحاول أرد على الجميع على قد ما أقدر.
ولما بلاقي نفس السؤال بيتكرر، بعمل بوست مجمع بالإجابة عشان يكون مرجع للجميع.
فيا ريت قبل ما تبعتوا على الخاص، راجعوا البوستات اللي زي ده، وإن شاء الله هتلاقوا إجابة سؤالك فيها. ❤️
❓ لو نزلي رقم قيد، لكن اسمي مش موجود في كشف الجلسة، أعمل إيه؟
📌 الحالة الأولى: لو وصلتك رسالة بميعاد الجلسة، روح واحضر، وإن شاء الله تستلم الكارنيه.
📌 الحالة الثانية: لو اسمك مش موجود في الكشف، ومفيش رسالة وصلتك، فأنصحك (وطبعًا ليك حرية الاختيار) لو أنت من محافظة بعيدة، بلاش تروح من نفسك، خصوصًا بعد اللي حصل في آخر جلسة.
ولو حضرتك مُصر تروح، حاول تكون موجود بدري، لأن لما بيكون العدد كبير، الأولوية بتكون غالبًا للي وصلتهم رسالة أو أسماؤهم موجودة في الكشف.
❓ وصلتلي رسالة أو لقيت اسمي في كشف الجلسة، لكن أنا أصلًا محضرتش المقابلة الشخصية.
دي غلطة اتكررت أكتر من مرة.
لو حضرتك محضرتش المقابلة، يبقى ملفك لسه متسلمش، وبالتالي لسه متقيدتش، فحتى لو نزل اسمك في الكشف أو وصلتك رسالة، مش هتقدر تحلف اليمين.
❓ فاتتني جلسة حلف اليمين، أعمل إيه؟
تقدر تحضر أي جلسة بعدها عادي، وغالبًا اسمك مش هينزل في كشف جديد.
❓ عندي ظرف ومش هقدر أحضر الجلسة.
مفيش مشكلة، احضر الجلسة اللي بعدها.
❓ لو مروحتش الجلسة، أقدر أروح أستلم الكارنيه في أي وقت؟
لا، لازم تحضر جلسة حلف اليمين أولًا، لأن استلام الكارنيه مرتبط بحلف اليمين.
يعني مينفعش تستلمه من النقابة الفرعية أو من النادي في أي يوم مفيش فيه جلسة.
❓ هل الروب إجباري؟
لا، الروب مش شرط لحضور الجلسة، وتقدر تحضر من غيره عادي.
المهم يكون اللبس فورمال، وبالنسبة للبنات غالبًا مش بيدققوا أوي.
⚠️ نصيحة مهمة جدًا
بعد ما تستلم الكارنيه، راجع كل بياناتك كويس قبل ما تمشي، خصوصًا الاسم والعنوان، لأن أحيانًا بيكون فيه أخطاء، ولو اكتشفتها وقتها هتقدر تطلب تصحيحها ويطبعولك كارنيه جديد بالبيانات الصحيحة.
📸 ونصيحة كمان: ياريت لو تقدروا، خدوا معاكم صورة شخصية احتياطي، لأن أحيانًا الكارنيه بيحتاج صورة.
ولو معاكش صورة، مفيش مشكلة، روح عادي.
💰 ولو إيصال الدفع مش معاك، برضه مفيش مشكلة، ومش هتدفع أي رسوم تاني.
لو فيه أي سؤال مجاوبتش عليه، اكتبوه في التعليقات وإن شاء الله هرد عليه. 🩷
ياريت تعملوا شير للبوست عشان يوصل لكل زميل عنده جلسة حلف يمين، ويمكن يفيد حد بيدور على إجابة لسؤاله. ❤️
ربنا يوفقكم جميعًا، ويجعلها بداية خير عليكم يا أساتذة. 🤍⚖️
