⛔️مادة الرياضيات:
بلاك تجيكم شويا بيزار كي رايحة نقولكم بلي هي المادة لي تقدرو تضمنو فيها عشرين وهي المادة الوحيدة لي طلعكم عام الباك الرياضيات حسابات تقرا تفهم تجيب فيها مفيهاش تفلسيف واسئلة نظرية و استنتاجات وكامل هذاك الخرطي وتكسار الراس. الوحدة الاولى تع الدوال في الباك يجيكم سيجي فيه اسية وسيجي فيه لوغاريتمية متقولوش نقرا اسية ومنقراش لوغاريتمية هذا اكبر خطأ بصك راكم تحددو في مصيركم من ثم ا بعد هذا يمكن انو سيجي لي رايح تخيرو نت علاجال دالة تع 7 نقاط رايح تضيع هذيك ال 13 نقطة كاملة (هنا البني ادم يكون ذكي شويا مش لهذي الدرجة يعني )
1️⃣وحدة الدوال من اسهل الوحدات لانو اول وحدة وزيد نفس الاسئلة تتكرر من السؤال الاول حتى للسؤال ما قبل الاخير ايا وزوج اسئلة الاخيرة هي لي تكون جديدة ولا زعم فكرة جديدة برك هذااا مكان.
2️⃣وحدة المتتاليات من اشد الوحدات تكرارا للاسئلة يعني من السؤل الاول للسؤال الاخير كاملين متكررين مكانش حاجة جديدة من غير السؤال الاخير تع المجاميع هذاك فيه شويا تخمام ومايكونش عليه بزاف نقاط ماكسيموم نقطة وحدة
3️⃣وحدة الاحتمالات لي يحبها يعتبرها لعبة لازم كي تكزن تحل الاحتمالات تهدر بينك وبين روحك وتخدم بالالوان ضورك تحلالك الوحدة هذي وللصراحة بزاف ممتعة (من أحب الوحدات عندي)
4️⃣وحدة التكامل هذي نحشم نسميها اصلا وحدة تالمو يجي عليها سؤال برك في الباك مع التمرين تع الدوال مع الاخير خلااااص تحفظ قانون و طبقو لا زيادة لا نقصان
5️⃣وحدة الاعداد المركبة لي يخلعوك بيها ويقولولك واعرة و متقدرلهاش غير يكذبو عليك تحفظ الدائرة المثلثية ايا بصحتك 90 بالمئة من الوحدة هذي كاملة
⛔️نجيو ضوركا كيفاش يجي سيجي تع الباك‼️
التمرين الرابع لي ديما يكون الدوال(اما اسية او لوغاريتيمية)
التمرين الثالث لي معظم و اغلبية البكالوريات يجي متتاليات(اما هندسية او حسابية او في زوج مع بعض بصح عامة ديما يجمعوهم في زوج مع بعض)
التمرين الثاني و الاول يباو مرة على مرة يتعاكسو مرة الاحتمالات هوالاول و الاعداد المركبة هو الثاني ومرات العكس في حين انو في بعض الاحيان الاعداد المركبة قادر يجي صحيح او خطا ولا اختيار من متعدد (نتاع اختر الاجابة الصحيحة مع التبرير)
⛔️نجيو لموضوع الاستاذة تع المادة هذي‼️
حبيتكم تفهمو حاجة ولي هي منقدرش نرشحلكم اساتذة يمكن يكونو انا ساعدوني بصح نتوما مايساعدوكمش انو التلميذ مختلف عن التلميذ الاخر مثلا انا نقولك منقدرش نقرا الدوال من عند كاش واحد ماعدا نور الدين بركككك وكاين لي يقولي نو انا منقدرش نقراهم عندو بصك يطول بزاف وثقيل كيما كاين لي انا نقولو يعجبني امير الرياضيات في الاحتمالات بصك مدايرهم كيما اللعبة وغيري يقولي لال انا يعجبني جوفر خير وكل واحد ورايو في النهاية وكل واحد يتبع الاستاذ لي يساعدو😭❤️
⛔️نجيو ضوركا ل كيفاش نقدر نتمكن من الرياضيات‼️
هذي المادة تقرا تلقى من للخر 👍🏻😉مهما تحل تمارين بزاف ما تحبسش حتى تولي هذيك الوحدة
سامطتلك اقرا و اتعب و اسهر وحل تمارين ونماذج وسلاسل تع ليكور وتع ليسي .
اول حاجة اقرا الدرس
ثاني حاجة لخصو ديرلو القوانين لي فيه
ثالث حاجة ابدا بالتمارين كاين لي يبدا يتفرج استاذ وهو يحل التمرين وهو يتبع بعينو برك منبعد يبدا يحل هو وحدو
وفي النهاية ننصحكم نصيحة نتمنى تخدمو بيها⛔️⛔️ماتحلوش تمرين ونتوما ماعندكمش الحل نتاعو خاصة اذا كان صعيب ⛔️⛔️😭😭😭❤️بصك قادر تحلوه بطريقة خاطئة وتبقاو تمشو بهذاك الخطأ😭❤️
يادرا كشما استفدتو من هدرتي ول؟ووشنو هي المادة الجاية لي بغيتوني نهدرلكم عليها ؟(باي ذ واي رايحة نهدرلكم على جميع المواد باذنه تعالى)
4
1September 3, 2026 94 1 1
