✨ تجربتي بالبكالوريا ٢٠٢٦
السلام عليكم دفعة ٢٧ 🫶🏻🤍🌷
أغلبكم هلق بلّش بالمنهاج، وحبيت أشارككم تجربتي، يمكن تستفيدوا منها 🤍.
بفضل الله، ثم بدعم أستاذتي وأهلي، جبت ٢٣٨.٧ وكنت الأولى على مدرستي 🥹.
📚 نصائح عامة:
🚨 أكبر غلطة عملتها كانت التراكم. بالصيف كنت أراكم، وفوقها بالشهر السادس تقريبًا ما درست بسبب ظرف، وما بلشت أدرس بجدية إلا بنص السابع. الحمدلله عطونا عطلة أسبوع قبل المدارس وقدرت أتدارك كتير من الي قصرت فيه .
و كنت إذا تراكم معي شي بسبب ظرف، وزعه على الأيام الجاية وما خليه يكبر.
🔁 بالمراجعة لا تفكروا إنه لازم تعيدوا كل مادة أكثر من مرة لتجيبوا مجموع. أنا أعدت العلوم مرتين فقط، وباقي المواد ما احتجت. الدراسة بتركيز أهم من كثرة الإعادة.
مع ان الفكرة سببتلي اكتئاب و خوف و الحمدالله تعب السنة ما ضاع
📚 لا تتعددوا بالمصادر؛ الكتاب + مصدر مناسب + الدورات والوزاريات غالبًا كافيين.
💡 أشياء ساعدتني:
📐 بالرياضيات خصصت دفتر للأفكار، أكتب فيه الفكرة وأسئلة مشابهة ه الشي الأغلب ما بيعرف قيمته انه يساعدك تميز الأفكار بدل الحفظ البصم الرياضيات بعيدة تماما عن الحفظ و بدها مراجعات كتير خلال الدراسة.
🧬 بالعلوم كنت أختبر نفسي بعد كل درس وأرجع لأخطائي حتى أتمكن منهم.
⚡ بالفيزياء كنت أفهم أول ثم أحفظ، وأعمل مخططات بسيطة ب الرموز لفقرات الوحدة الثانية و الإلكترونيات كتير ساعدني هالشي .
🇬🇧🇫🇷باللغات كنت أكتب مفردات كل نص و ترجمتهم هالشي يساعدكم ب النصوص و سوال الترجمة اعتمدت ملف للأستاذ لؤي الكريم و كان خارق لان اول سنة كان نموذج تحريري أنكليزي
❌ أوهام لا تضيعوا وقتكم فيها:
لا تحلوا كل سؤال موجود عالنت، ح تتشتتوا كتير .
إذا ضاع يوم، لا تعتبروا كل شي انتهى. حتى ساعة دراسة أفضل من ولا شي.
لا تقارنوا حالكم بغيركم.
⚠️ أكثر أخطائي كانت: التراكم، المقارنة، تعدد المصادر، وتأجيل المواد السهلة، خصوصًا العربي.
و إهمال مواد ع حساب مواد كلشي لازم ياخد حقه
📚 تجربتي مع المواد
📐 الرياضيات — 593/600
راجعت أساسيات العاشر والحادي عشر، وكانت المادة الوحيدة اللي أخذت فيها خصوصي. اختاروا أستاذ يخليكم تحلوا بإيدكم و كل شوي يجبركم تراجعوا وحدة ، وإذا ما عرفتوا حل سوال لا تفتحوا الدليل مباشرة. حلوا نماذج ووزاريات كثير، وبالامتحان حطيت راسي بالورقة وما التفت لحدا. وبرأيي الأسئلة كلها كانت من الكتاب، لكنها كانت طويلة.
⚡ الفيزياء — 400/400
لا تضيعوا وقتكم بأسئلة خارج نمط الكتاب. نموذج أو نموذجين لكل درس مع الدورات كافيين، وافهموا النظري قبل حفظه.
📖 العربي — 394/400
مادة خفيفة، وساعة إلى ساعة ونص يوميًا بتكفي. غلطتي كانت تأجيلها وتعدد المصادر. بالقراءة فادتني نوطة الأوائل، وبالموضوع الأدبي ملف الآنسة شهد.
🧬 العلوم — 300/300
مفتاحها التكرار. كنت أراجع ٣–٤ دروس بنهاية الأسبوع وأختبر نفسي بعدها، وهي المادة الوحيدة اللي أعدتها مرتين.
☪️ الديانة — 200/200
كنت اكره دراسة المادة لان ما اعرف لا شو احفظ و لا شو المهم بعدين اكتشفت نوطة الواضح ساعدتني نمط السوال ب المادة و سهلت علي الدراسة كثير.
🧪 الكيمياء — 200/200
الكتاب مع الدورات ونموذج أو نموذجين لكل درس كافيين. بالبداية لخصت، وبعدها اكتشفت إنه ما كان في داعي و ضاع وقتي.
🇬🇧🇫🇷 الإنكليزي والفرنسي — 300/300
ركزوا على المفردات والقواعد السابقة. أنا غلطت و ما حفظت كل المواضيع، لكن بنصحكم تستغلوا الوقت وتحفظوها كلها.
🩵 آخر كم نصيحة:
اختاروا رفقات يشجعوكم، لأن الصاحب ساحب.
خففوا الطلعات، بس ما تختفوا نهائي من الحياة😂 طلعة خفيفة بترجع الطاقة و ما يروح اليوم.
ايام الامتحان ما تروحوا نهار ع مادة قدمتوها و خلصتوا حتى لو كنت مخلصين انسوا و كفوا لان الوقت حرفيا ع القد
آخر أسبوع مراجعة ركزوا على المادة الأولى فقط، ولا تشتتوا حالكم ب الي ما خلص ب المراجعة
🌱 شو تعلمت؟
مو لازم كل يوم يكون مثالي. المهم ما توقفوا. الظروف ممكن تعطلنا، لكن الأهم نرجع ونكمل. خذوا من تجارب غيركم اللي بناسبكم، وابنوا طريقتكم الخاصة.
🤍 بالنهاية: دعوات المحبين + الصبر + الاجتهاد + التوكل على الله.
يمكن كان تواجدي قليل ع الجروب لان كنت ادخل اسأل و اطلع و لكن رسائل المشرفين و دعاويهم كلها تركت اثر لو انه بسيط بس ما بنساه ل ه الأثر 😊🩵
إن شاء الله السنة الجاية كل واحد فيكم يكتب تجربته وهو مبسوط بنتيجته 🎓🤍.
بالتوفيق دفعة ٢٧ 🌷
Forwarded fromRorey
81
16
9
2August 21, 2026 2.7K 33 63
