أكو شغلة دائماً أؤمن بيها: المنافسة مو عيب، بس قلة الأصل عيب.
قبل فترة نشرت فيديو أحچي بيه عن بعض الأشخاص اللي ياخذون مبلغ قليل من الطالب بالبداية، وبعد ما يوصل لروسيا يبدون يطلبون منه مبالغ إضافية وكبيرة. واكو احد الاشخاص شاف الفيديو، وبدل ما يناقش الفكرة، بدأ يحچي عني ويسقط بيه بصورة غير مباشرة، وبعدها اكتشفت إنه يشتغل ويا ناس منافسين إلي بهذا المجال.
بالمناسبه هذا الشخص قبل سنتين كان أحد الطلاب اللي قدموا عن طريقي. صحيح هو دفع فلوس مقابل الخدمات، وهذا حقه وحقنا، لكن الموضوع بالنسبة إلي ما كان مجرد «دفع فلوس وانتهى». من وصل روسيا، بقيت وياه وساعدته بكلشي يحتاجه، وحتى رحت للسكن ماله وكنت أروحله بشكل يومي حتى أتأكد إن أموره تمام. وبوقتها هو بنفسه طلع ويانا بفيديو موجود بالقناة وتكلم عن تجربته ومدح بالتقديم والاستقبال والأمانة والثقة.
وهنا أريد أوضح شغلة: ما عندي أي مشكلة إذا اي شخص اشتغل ويا منافس إلي. كل إنسان من حقه يشتغل ويختار الجهة اللي تناسبه، لكن اللي ما أفهمه هو ليش حتى تشتغل ويا منافس، لازم تسقط بالشخص اللي كنت تتعامل وياه سابقاً؟
والله لو جان جاني وكال: «أريد أشتغل وياك»، ما جان عندي أي مانع، بالعكس، جان ممكن أشغله وياي وأساعده حتى يطور نفسه.
فالموضوع مو عن الفلوس ولا عن الشغل… ليش الإنسان يبيع موقف وعِشرة ومعروف، بس لأن مصالحه تغيرت؟
إحنا ممكن نختلف، ممكن نتنافس، وكل واحد يختار طريقه، بس لا تنسى الشخص اللي وقف وياك وكان صادق بوعوده وياك بوقت صعب تحصل شخص ثقه وصادق. الفلوس تروح، والشغل يتغير، والمصالح تتبدل… بس الأصل يبقى أصل، والسمعة تبقى وياك.
رسالتي لكل شخص بهذا المجال: نافسني، نافس غيري، حاول تكون أفضل مني… بس نافس بشرف. لأن النجاح الحقيقي مو إنك تسقط غيرك حتى تطلع، النجاح الحقيقي إنك تصعد بمجهودك وأخلاقك.
32
9
2
2August 22, 2026 3.8K 42 5
