موغانا جئیران
یئردن آیاغینی قوش کیمی اوزوب
یای کیمی دارتیلیب اوخ کیمی سوزوب
یئنه اؤز سورونو نظاملا دوزوب
باش آلیب گئدیرسن هایانا جئيران
نه گؤزل یاراشیر موغانا جئيران
ازلدن مئيلينى سالیب چوللره
بختینی تاپشیردین بیزیم ائللره
او قارا گؤزلرين دوشوب دیللره
دیشلرین اوخشاییر مرجانا جئيران
نه گؤزل یاراشیر موغانا جئيران
اووچى اینصاف ائله کئچمه بو دوزدن
او چؤللر قیزینی آییرما بیزدن
قویما آغری کئچه اورگیمیزدن
قییما اؤز قانینا بویانا جئيران
نه گؤزل یاراشیر موغانا جئيران
بیر مثل قالمیشدیر آتا بابادان
اوچاردا توراجدیر قاچاردا جئيران
بیر من دگیلم کی حسنونه حئيران
شؤهرتون یاییلیب هر یانا جئيران
نه گؤزل یاراشیر موغانا جئيران
سکوتا غرق اولموش اورگیمله
من کئچیرم یئنه ده موغان چؤلوندن
یانیندا بالاسی یاغیش گولوندن
اگیلیب سو ایچیر بیر آنا جئيران
نه گؤزل یاراشیر موغانا جئيران
ائله کی سون باهار مین بساط قورور
کوللاری کوسلاری ییغیب اوچورور
سیخناشیب بیر یئره باش باشا دورور
دوشنده چوغونا بورانا جئيران
نه گؤزل یاراشیر موغانا جئيران
اون آددیم کناردا یاتماییر تکه
گزینیر اویلاغا باش چکه چکه
گلن قارالتیدیر یوخسا تهلکه
بیر اؤزونه باخیر بیر اونا جئيران
نه گؤزل یاراشیر موغانا جئيران
@ranginkamn539🌈🌈
September 8, 2026 17
