شلون أگلها وشرد أگلها
واليحبها ملولحة روحه بكلامه
وهي شامة وعندها شامة
والربيع تجيبه گوة تگعده من هودچ منامه
وتجني منه الورد الأحمر تاخذه تصوغه إبتسامة
الليل لو رادت تودعه وتحدي شمعتها بظلامه
يتعب المرايا مشطهاويگضي صبره
ويصعد التل الشعر حگ السلامة
وهي لو بالعيد طلعت
يضحك العيد على روحه
وبالشتاء يصير الدخول
وينشگ الطليع هامة
وهي حلوة وچنها مهرة
وعابرة الشط وبشهامة
چنها مهرة أرچابها يغني لرسنها
ولف سرجها بهوى حزامه
وهي واحة كلها ماي وكلها راحة
وگمرة ويا الصبح عندها
وما نفرزن ضي گمرها من صباحه
وهي واحة وفيّ نخلها
وين ما يحلاله يفرش
يعن بيّه وبيّه يطرش
وبالگلب باني على جرحه
وبالصبي عاشن أيامه
وعلى الحواجب ديرة أهله
وعلى الرمش ديرة عمامه
وهي خطار الهوى وهي المعزبة
وياما ياما
ضوة مشمرها لصدرها
والچفافي چن غزالة
تثني أديها وترضع بگذلة غرامه
وگفت بريش الگطايا
وفرشت بريش النعامة
ومايها ماي السماوة
وطينها طين النشامة
وبخت عد ذاك اليوجّي بمايها ويربط بلامه
وهي حلوة
حلوة ومحمله وطويلة
وتامة وفوگ التمامة
شايله البستان كله
وغاطة بالجوري گامة
الريح لو يشبگ عليها
تهوف روحه وتنمرد
من يومها ليوم القيامة
لو جرح بالليل يدي
وتعصر جفونه الندامة
مانفرزن هذا جرحي لو جرحها
وهن توم وما نعرفه هذا ياهو من التوامة
شلون أغطي جروحي بيها
وجرحي صورة وهي جامة
شلون أخلص گلبي منها
وگلبي خيط وهي خامة
شلون أضل مادور بيها
وآنا ليلة وهي دفتر روزنامة
April 7, 2025 527 2
