دليلك لبدء العمل أونلاين (تحديث لبوست قديم)
إذا كان بدي اختصر خبرتي بمجال العمل أونلاين على مدار السنين السابقة ف رح اختصرها بهي النقاط:
1⃣ أول نقطة:
تحديد تخصص
شوف شو الشي اللي انت بتحبو وممكن ياخد من وقتك ساعات من دون ما تحس وحاول تحولو لشغل أونلاين ..
وعلى فكرة مو شرط تكون خبير حتى تبلش تطالع مصاري لأنو في عملاء بحاجة شغل المبتدئ على حسب الميزانية المتوفرة .. وتذكر دائماً انك سابق غيرك بخطوة والخطوة اللي سابقها في مين بيدفع عليها
2⃣ تاني نقطة:
تعلم المهارات الأساسية والمكملة للتخصص اللي اخترتو
بلش بالمهارات الأساسية بعدها بلش طبق فوراً لا تنطر تصير خبير .. الخبرة ما رح تصير بدون تطبيق وإذا ضليت ناطر ما رح توصل
لا تخلي ولا يوم يمرق عليه بدون ما تكون متعلم شي جديد بمجالك
3⃣ النقطة التالتة:
تعلم التسويق بالمحتوى وتعلم تعمل براند شخصي
شو فائدة تكون خبير بس ما بتعرف توصل للعملاء وما حدا سمعان فيك؟
انت على مستوى الصيدلية تخيل حالك شاطر كتير كتير بس ما كنت بتعرف تشرح للمريض عن دوا معين ف هوي ببساطة رح يقول عنك مو شاطر 🙃 .. وعالنت نفس الشي لازم تتعلم توصل للجمهور المستهدف
4⃣ النقطة الرابعة:
بناء علاقات مع أصحاب الخبرات
ضيفن عالفيس .. تابعن على صفحاتهن .. خليك موجود بالتعليقات وبالرد عالستوريات
نزل لينكدان زبط حسابك وحط كلمات مفتاحية متعلقة بمجالك .. تابع خبراء بمجالك واتفاعل معن
بس بنيت علاقات هي العلاقات ممكن تكون طريقك للشغل بيوم من الأيام ورح تترشح للوظيفة من خلالن ✔️
5⃣ النقطة الخامسة:
تجهيز معرض الأعمال
شو بدو يكون بمعرض الأعمال إذا لسا ما لاقيت شغل؟
بتحطوا فيه أعمال وهمية .. تطبيقات لمشاريع تدربتوا عليها أو بتتخيلوا حدا طلب منكن شغل معين وبتنفذوه
بتتعلموا شو لازم يكون موجود بمعرض الأعمال وكيف الترتيب .. وإذا اخترتوا كتابة المحتوى فالدليل اللي عملتوا موجود فيه كل التفاصيل
هي الخطوات أساسية ومشتركة بكل المجالات اللي ممكن تشتغلوها
ومستحيل ينجمع كل شي عن الشغل أونلاين ببوست واحد لهيك خليكن متابعين البوستات عالقناة وضيفوا عليها معلومات هاد البوست بتوصلوا للي بدكن ياه 😄
موفقين ❤️
ولأي سؤال فيكن تتواصلوا معي على حسابي
@ZainabEsmael
6January 30, 2026 886 8
