ألف مبروك لدفعة 2007 نجاحكم ف المرحلة التمهيدية ،وحلة جديدة وتخصص من أمتع وأرقى التخصصات الطبية اللي حتحسوا فيها بقيمتكم العلمية والطبية. الصيدلة مش مجرد حفظ أدوية، الصيدلة هي علم تركيب الحياة، الخبير الأول بالدواء، وخط الدفاع الأول عن صحة المريض. أهلاً بكم في عالم الصنع والكيمياء وعلم الأدوية، تخصص يبي بال واسع، لكن ممتع جداً للي يحبه وينظم وقته فيه.
نظام الدراسة (نظام الفصل المغلق)
النظام هذا تعتبروا أنتم ثالث دفعة تقروا بيه. هو نظام شبيه بنظام السنة، لكن مش سنة..
كيف؟
تقسيم الباكجات (Packages)
أول ما تخشوا الكلية حيقسموا الدفعة لمجموعتين:
Package A
Package B
ملاحظة| ممنوع التنقل بين الباكجات لعند التخرج يعني الباكج اللي بتجو فيه حتكملو فيه رحلتكم كاملة.
طريقة تنزيل المواد والدور الثاني
مفيش حاجة اسمها تختار موادك وتنزلهم بروحك، ف جدول ثابت لكل سيمستر.
علاش شبيه بنظام السنة؟ لأن عندنا دور ثاني.
لا قدر الله لو قعدتلك مادة في السيمستر الأول، مش حترفعها معاك للسيمستر الثاني بشكل مباشر حتخش السيمستر الجديد تقرا مواده عادي، وبعدين تحسب المواد اللي قعدولك على طول السيمسترين وتخش بيهم دور ثاني بعد نهاية السيمسترين (باذن الله مش حتقعدلكم ولا مادة).
توزيعة الدرجات والمواد
المواد تقريباً كلها فيها شق عملي، لكن يختلف من مادة للثانية (فيه مواد عملي في المعمل تشتغلو بإيديكم، وفيه مواد العملي متاعها ينقرا كنظري).
تقسيم الـ 100 درجة:
20 درجة: امتحان النصفي (المواد الأخف تكون 15 نصفي + 5 شفوي/Oral).
20 درجة: أعمال الفصل (تعتمد على الدكتور: كويزات، العروض التقديمية Presentations، TBL، أو تقارير Reports).
20 درجة: امتحان العملي (تكون إما 20 عملي عملي أو 10 عملي عملي و10 نظري العملي، أو 20 نظري العملي حسب المادة).
40 درجة: الامتحان النهائي (Final).
المواد نقروا فيهم كمواد مدموجة (مثلاً مادة 1 و 2 مع بعض في سيمستر واحد)، يعني بدلاً ماتنزل على سبيل المثال فسيو 1 في سيم وبعدين انزل فسيو 2 ف سيم تاني حتقراهم الزوز 1/2 مع بعض ف نفس السيم منهجها دسم شوية لاكن تقدروها.
مواد Package A:
علم وظائف الأعضاء (Physiology)
علم الصيدلانيات 1 (Pharmaceutics 1)
الصيدلة الفيزيائية (Physical Pharmacy)
علم الأنسجة والتشريح (Histology & Anatomy)
مواد Package B:
علم العقاقير الصيدلانية (Pharmacognosy)
الكيمياء العضوية (Organic Chemistry)
الكيمياء التحليلية (Analytical Chemistry)
نظام الحضور والغياب
المحاضرات النظرية على جو الدكاترة في من ياخد غياب وفي لا، لكن نصيحة من شخص مجرب ومصفي مواده احضروا الدكاترة ربي يبارك شرحهم، والكلية مفيهاش كورسات خارجية، فالمصدر الأساسي هو المحاضرة.
الحضور إجباري بالنسبة للمعامل لو تتجاوز نسبة غيابك 25% حتحرم من دخول امتحان الفاينل فـ ردوا بالكم تتغيبوا على المعامل.
وهكي تقريبا دويت على نظام كامل.
روابط وقنوات مهمة تستفيدوا منها:
اهم قناة ف القنوات وهي الحصن المنيع ضد الرسوب وحتوقف معاك اكثر من نفسك
قناة صيادلة-جامعة طرابلس
قناة حتلقاها ف وقت الشدة
قناة المستقبل
قناة بيتغير اسمها قريبا ننصحكم بيها
باكج صيدليون سنة اولى فيها كلشي على المواد
قناة صيدليون
قناة ترفيه
قناتي كشكول
قناة خاصة بالمزنوقين
قناةً مليحة را
ختاماً بالتوفيق يا صيادلة، وإن شاء الله رحلة موفقة ومكللة بالنجاحات🤍.
8August 31, 2026 347 4
